Što viadoma pra vyzvaleńnie palitviaźniaŭ? Piać pytańniaŭ i adkazaŭ
16 žniŭnia Alaksandr Łukašenka padpisaŭ ukaz ab pamiłavańni 30 palitviaźniaŭ. Hramadstva čakała, što ludziej pačnuć adpuskać adrazu. Zdajecca, siońnia praces usio ž pačaŭsia. Sabrali piać pytańniaŭ, jakija mahli ŭźniknuć z nahody hetaha pamiłavańnia.
1. Hetyja 30 čałaviek — novyja vyzvalenyja? Ci ŭklučajuć u siabie tych 18 čałaviek, jakija ŭžo vyjšli 3 lipienia?
Niezrazumieła, dakładnaha adkazu niama. U Ofisie Cichanoŭskaj mierkavali, što ciapierašni ŭkaz «uzakoniŭ» lipieńskaje vyzvaleńnie pryblizna 18 čałaviek, a taksama dazvoliŭ vyjści na svabodu jašče pryblizna 12 źniavolenym.
Adnak tady niezrazumieła, na jakoj jurydyčnaj padstavie ludziej vyzvalali 3 lipienia, kali na toj momant ukazu jašče nie było. Zrešty, u Biełarusi pa-raniejšamu nie da zakonaŭ.
2. Pra jakuju kolkaść vyzvalenych 19-20 žniŭnia viadoma?
Kožnaja pravaabarončaja struktura sprabuje sabrać hetuju infarmacyju. Na ciapierašni momant najbolšuju ličbu nazyvaje «Viasna» — vałancioram udałosia ŭžo identyfikavać 7 čałaviek.
3. Kali hramadstva daviedajecca imiony vyzvalenych?
Niezrazumieła. Mahčyma, prapahanda paličyć patrebnym nazvać imiony, kab dadatkovy raz padkreślić svoj «humanizm». Źjavilisia śviedčańni taho, što siońnia kala kałonij pracavali žurnalisty ANT. Mahčyma, pamiłavanych pakažuć u viečarovym efiry.
Kali ž prapahanda nie nazavie imiony, i sami vyzvalenyja ludzi (ci ich svajaki) nie vyjduć u publičnuju prastory, to imiony nie buduć apublikavanyja. Heta pryncypovaja pazicyja pravaabaroncaŭ, jany miarkujuć, što dla vyzvalenych ludziej tak budzie biaśpiečniej.
Ź ludziej, jakija vyjšli na svabodu 3 lipienia, u vyniku byli apubličanyja Ryhor Kastusioŭ, Darja Łosik, Palina Pałavinka i jašče niekalki čałaviek. Niama nijakich śviedčańniaŭ taho, kab heta infarmacyja adbiłasia na ich ci stvaryła im dadatkovyja pahrozy.
4. Navat kali nie nazyvać imiony, to možna apisać, što abjadnoŭvaje vyzvalenych ludziej?
Bolšaść pamiłavanych, pra jakich viadoma «Našaj Nivie», uvachodzili ŭ humanitarny śpis, składzieny biełaruskimi pravaabaroncami i demakratyčnymi siłami. Tudy traplali ludzi ź vialikimi prablemami sa zdaroŭjem, piensijaniery, a taksama tyja, chto trapiŭ za kraty zusim maładymi. U Łukašenki prasili adpuścić i šmatdzietnych baćkoŭ.
Sistemu, pa jakoj vyzvalajuć tych ci inšych ludziej, pakul nie ŭdajecca vyznačyć.
Siarod vyzvalenych jość i miedyjnyja asoby, i tyja, chto nie byŭ publičnym. Jość tyja, kamu zastavałasia siadzieć mienš za hod, ale jość i tyja, u kaho nieadsiedžany termin pieravyšaje 10 hadoŭ.
Ale pakul niama prykładaŭ, kab kahości adpuskali biez prašeńniaŭ ab pamiłavańni, jak zdarałasia ŭ 2011 i 2015 hadach.
5. Kali čakać novych vyzvaleńniaŭ?
Juryj Vaskrasienski zajaviŭ, što peŭnaja kolkaść palitviaźniaŭ moža vyjści na svabodu 17 vieraśnia, u Dzień narodnaha adzinstva. Kankretnuju ličbu jon nie nazyvaŭ, dyj i viery jamu niašmat — Vaskrasienski anansuje masavyja amnistyi palitviaźniaŭ jašče z 2021 hoda.
Tym nie mienš dakładna viadoma, što ŭ kałonijach praciahvajecca praca pa składańni śpisaŭ na nastupnaje vyzvaleńnie.
Jak skłałasia žyćcio vunderkinda z Žodzina, jaki ŭ 12 hadoŭ pastupiŭ u miedycynski ŭniviersitet?10
Kamientary