Niaščaście zdaryłasia napiaredadni ŭ vioscy Ałhabas Turkiestanskaj vobłaści, tam zhareŭ dom.
Pavodle słoŭ susiedziaŭ, u domie znachodzilisia hości, bo napiaredadni ŭ haspadaroŭ pravodziłasia mierapryjemstva. Płošča pažaru skłała 360 kvadratnych mietraŭ, paviedamlaje Tengrinews.kz.
«Padčas praviadzieńnia raźviedki i tušeńnia pažaru z doma byli evakuiravanyja try čałavieki ŭ nieśviadomym stanie, pieradadzienyja bryhadzie chutkaj miedycynskaj dapamohi. Unutry vyjaŭleny 12 zahinułych, uklučajučy dzieviać dziaciej», — havorycca ŭ paviedamleńni.
U domie pražyvali dźvie siamji, a susiedzi paviedamlajuć, što napiaredadni tut prajšło siamiejnaje mierapryjemstva z načoŭkaj haściej. Pry pažary dach budynka abrynuŭsia, što jašče bolš uskładniła vyratavalnuju apieracyju, paviedamlaje Kz24.news.
Na miescy pracujuć usie ekstrannyja słužby. Pačata rasśledavańnie, pryčyny ŭzharańnia vyśviatlajucca.
Zaviedziena kryminalnaja sprava. Miedyki paviedamili, što troje vyžyłych — dvoje darosłych i adna dzicia — znachodziacca ŭ reanimacyi ŭ ciažkim, ale stabilnym stanie.
Kamientary