Što raskazvajuć pra byłoha palitviaźnia Ramana Ramanava, jaki pamior u 43 hady
U kałonii jon dapamahaŭ amal ślapomu Vacłavu Arešku.
Stała viadoma pra śmierć 43‑hadovaha byłoha palitviaźnia Ramana Ramanava. Jaho aryštavali ŭ śniežni 2023 hoda, a praz hod asudzili pavodle artykułaŭ ab «abrazie Łukašenki» i «abrazie pradstaŭnika ŭłady» na dva hady kałonii. Raman adbyvaŭ termin u ivacevickaj kałonii №22 «Voŭčyja nory», a na volu vyjšaŭ u žniŭni 2025 hoda.
Tyja, chto siadzieŭ razam ź im, uspaminajuć jaho jak spakojnaha i dobrazyčlivaha čałavieka.
«Toje, što ź im zdaryłasia, što jaho pasadzili, Raman uspryniaŭ vielmi hodna i spakojna. Razumiejučy, što jon nijaki nie złačynca. Nikoli nie płakaŭsia, što asudžany niespraviadliva. Usprymaŭ heta jak taki pieryjad žyćcia, jaki treba prosta pieražyć. I pažadana — z aptymizmam», — kaža «Našaj Nivie» były palitviazień, jaki adbyvaŭ termin u toj ža kałonii.
Jon zhadvaje, što Raman zaŭsiody staraŭsia dapamahać tym, kamu ŭ kałonii było ciažej za inšych. U adnoj siekcyi z Ramanam žyŭ palitviazień Vacłaŭ Areška — hramadski dziejač i aktyvist niezaležnaha prafsajuza REP, asudžany na vosiem hadoŭ kałonii. Arešku ŭžo 71 hod, i za čas źniavoleńnia jon amal całkam straciŭ zrok. Jon faktyčna nie bačyć i nie moža navat samastojna čytać listy.
«Raman zaŭsiody staraŭsia jamu dapamahčy ŭ pobytavych rečach. Naprykład, vynieści koŭdru na vybivańnie — u kałonii heta treba rabić rehularna. Areška sam užo amal nie moh hetaha zrabić, i Raman braŭ heta na siabie. I dapamahaŭ nie tolki jamu», — zhadvaje surazmoŭca.
Pa jaho słovach, Raman byŭ čałaviekam vielmi prostym u znosinach i biez usialakaha pafasu:
«Jon zaŭsiody razumieŭ žarty. Naprykład, kali žartam kazali što jon chiba z «domu Ramanavych», impieratarskaj siamji, jon uśmichaŭsia i adkazvaŭ: «Dy ja z samych prostych Ramanavych».
Raman skončyŭ BDUIR. Da aryštu jon zajmaŭsia sistemami achovy i sihnalizacyi i praciahnuŭ pracavać u toj ža firmie pa vyzvaleńni.
«Jak ja razumieŭ ź jahonych apoviedaŭ, jon nie prosta niešta ŭstaloŭvaŭ miechanična. Jon prajektavaŭ, prapanoŭvaŭ schiemy biaśpieki, niejkija kompleksnyja rašeńni. Pracy ŭ jaho zaŭsiody było šmat. Jamu daviarali i kalehi, i klijenty. Jon viedaŭ, što biez pracy nikoli nie zastaniecca», — kaža naš surazmoŭca.
Na voli paśla vychadu z kałonii Raman pražyŭ mienš za hod.
Ciapier čytajuć
Chto pradaŭ kvateru ŭ «Majaku Minska» źnikłaj Mielnikavaj? Takoha čałavieka nie isnuje22
Kamientary