Afhanskija taliby prapanavali ZŠA adnavić dypłamatyčnuju prysutnaść u Kabule i inviestavać u raźvićcio Afhanistana. Pra heta ŭ intervju The New York Times zajaviŭ ministr zamiežnych spraŭ krainy Amir Chan Mutaki.
Pavodle słoŭ afhanskaha dypłamata, havorka idzie vyklučna pra cyvilnuju prysutnaść ZŠA ŭ krainie, bieź viartańnia amierykanskich vajskoŭcaŭ. Taliby prapanujuć Vašynhtonu znoŭ adkryć pasolstva, padtrymlivać dypłamatyčnyja kantakty i ŭkładać srodki ŭ raspracoŭku radoviščaŭ karysnych vykapniaŭ, budaŭnictva płacin i daroh.
Mutaki zajaviŭ, što «raździeł vajny zakryty», i ciapier Afhanistan choča budavać adnosiny z ZŠA na asnovie ŭzajemnaj pavahi i «novaha raździeła pazityŭnaha ŭzajemadziejańnia». Jon taksama paviedamiŭ, što Kabuł hatovy adkryć svaje dypłamatyčnyja pradstaŭnictvy ŭ ZŠA.
Taliby raźličvajuć takim čynam vyjści ź mižnarodnaj izalacyi. Za apošni hod Afhanistan aktyvizavaŭ kantakty z Rasijaj, krainami Centralnaj Azii i dziaržavami Piersidskaha zaliva, zaklučyŭ šerah handlovych pahadnieńniaŭ i damoviŭsia z Rasijaj ab abaronnym partniorstvie.
Adnak ZŠA pakul nie demanstrujuć hatoŭnaści da narmalizacyi adnosin. U Dziarždepartamiencie zajavili, što taliby nie zabiaśpiečyli nieabchodnaj stabilnaści ŭ krainie i nie vykanali abaviazacielstvy pa baraćbie z teraryzmam. Vašynhton padkreślivaje, što ŭzajemadziejničaje z talibami tolki ŭ tych vypadkach, kali heta adpaviadaje intaresam ZŠA.
Za apošni hod adnosiny pamiž bakami navat uskładnilisia. ZŠA zblizilisia z Pakistanam, jaki raniej nanosiŭ avijaŭdary pa terytoryi Afhanistana, abmiežavali vydaču viz afhancam i zabaranili im ujezd u krainu. Akramia taho, taliby byli ŭniesienyja ŭ amierykanski śpis arhanizacyj, źviazanych ź niezakonnym utrymańniem hramadzian ZŠA.
U svaju čarhu, Kabuł nie vykanaŭ šerah patrabavańniaŭ prezidenta ZŠA Donalda Trampa. Taliby admovilisia viarnuć ZŠA kantrol nad avijabazaj Bahram i nie pahadzilisia addać pakinutaje amierykanskaje ŭzbrajeńnie. Taksama jany nie vyzvalili hramadzianina ZŠA, jakoha, pavodle ich viersii, uvohule nie ŭtrymlivajuć.
Pry hetym ekśpierty ličać, što ekanamičny patencyjał Afhanistana moža stać važnym faktaram dla mahčymaj budučaj supracy z Vašynhtonam. Kraina vałodaje značnymi, ale pakul niedastatkova raspracavanymi zapasami lityju, miedzi, žaleznaj rudy i redkaziamielnych mietałaŭ. Hetyja resursy majuć stratehičnaje značeńnie dla ZŠA.
U 2004—2021 hadach Vašynhton užo vydatkavaŭ amal miljard dalaraŭ na raźvićcio hornazdabyŭnoj haliny Afhanistana, ale značnych vynikaŭ heta nie pryniesła. Ciapier Kabuł maje pahadnieńni ŭ hetaj śfiery z kampanijami z Kitaja, Irana i Katara.
Razam z tym zachodnija krainy pa-raniejšamu nie pryznajuć urad talibaŭ zakonnaj uładaj Afhanistana. Kraina zastajecca ŭ mižnarodnaj izalacyi, a viarchoŭny lidar ruchu Chajbatuła Achundzada znachodzicca ŭ vyšuku pa ordary Mižnarodnaha kryminalnaha suda ŭ suviazi z abvinavačańniami ŭ pieraśledzie afhanskich žančyn i dziaŭčat.
Kamientary
Ničoha dziŭnaha, administracyja Trampa navat nie chavaje, što im plavać na pryncypy svabody i demakratyi, zakładzienyja zasnavalnikami ZŠA pad čas stvareńnia hetaj paŭnočnaamierykanskaj fiederacyi. Maŭlaŭ viartajcie kantrol nad avijabazy Bahram (darečy ab zdačy jakoj, jak i samoha Afhanistana z talibami ŭ abychod tahačasnaha praamierykanskaha ŭrada damoviŭsia asabista Tramp naprykancy svajho pieršaha prezidenckaha termina) - i tady pačniem razmaŭlać.
[Zredahavana]