Stała viadoma, jak skłaŭsia los iranskaj žančyny, jakaja ŭ znak pratestu raspranułasia va ŭniviersiteckim dvoryku

Incydent adbyŭsia, kali chidžab Darjajei vypadkova spoŭz z hałavy, pakul jana padymałasia pa prystupkach Isłamskaha ŭniviersiteta Azad u Tehieranie. Zahłyblenaja ŭ telefon, žančyna spačatku nie zaŭvažyła hetaha, adnak chutka jaje atačyli supracoŭniki maralnaj palicyi.

Pa słovach siabroŭki, mužčyny hruba schapili Darjajei i pačali zaciahvać jaje ŭ pamiaškańnie, dzie karajuć studentak za parušeńnie dres-kodu. U adkaz na ich dziejańni žančyna, maci dvaich dziaciej, samastojna raspranułasia da nižniaj bializny i prajšłasia pa dvary ŭniviersiteta, kinuŭšy vopratku pierad saboj sa słovami: «Nu, i što vy budziecie rabić?»

Videa z hetym momantam imhnienna razyšłosia pa sacsietkach i vyklikała mižnarodny rezanans. Pravaabarončaja arhanizacyja Amnesty International zajaviła, što Darjajei źniała vopratku «ŭ znak pratestu suprać hvałtoŭnaha prymusu da našeńnia chidžaba» i patrabavała jaje «nieadkładnaha i biezumoŭnaha vyzvaleńnia». U Łondanie, na Parłamienckaj płoščy, aktyvisty praviali akcyju salidarnaści ŭ nižniaj bialiźnie i čyrvonych płaščach u styli ramana «Apovieść słužanki».

Pavialičyć

Adnak, jak raskazała siabroŭka žančyny, realnaść paśla zatrymańnia była značna bolš žorstkaj, čym pakazvali ŭłady. Darjajei kinuli ŭ mašynu palicyi, dzie jaje hałavu zacisnuli pamiž kaleniaŭ supracoŭnicy — žančyna amal zadychnułasia i, pavodle jaje słoŭ, dumała pra toje, što jaje dzieci mohuć zastacca sirotami. Kab zrabić udych, jana ŭkusiła ruku palicejskaj.

Pavialičyć

U adździaleńni Darjajei ŭviali siedatyŭnyja srodki — z druhoj sproby, bo pieršaja ihołka złamałasia. Ačuniała jana ŭžo źviazanaj pa rukach i nahach na balničnym łožku, nie razumiejučy, dzie znachodzicca. Na praciahu 18 dzion jaje trymali pad nahladam, pieryjadyčna ŭvodziačy novyja dozy preparataŭ kožny raz, kali jana sprabavała daviedacca, što adbyvajecca.

Iranskija ŭłady aficyjna abviaścili Darjajei «chvoraj» i źmiaścili ŭ psichijatryčnuju ŭstanovu, tłumačačy hetym jaje ŭčynak na prystupkach univiersiteta. Sama žančyna śćviardžaje, što znachodziłasia ŭ zdarovym rozumie, a «dyjahnaz» staŭ sprobaj režymu zamaskiravać pratest suprać uładaŭ. Pa słovach siabroŭki, palicyja tym časam pahražała siamji Darjajei, u tym liku jaje dzieciam, a jaje byłoha muža prymusili publična paćvierdzić viersiju pra psichičnuju chvarobu — tolki paśla hetaha žančynu raźviazali i adpuścili.

Pavialičyć

Paśla vyzvaleńnia Darjajei papiaredzili, što za joj buduć sačyć, a jaje telefon budzie prasłuchoŭvacca. Žančynu abaviazali prymać antypsichatyčnyja preparaty za ŭłasny košt praz strachoŭku. Kali ŭłady zaŭvažyli, što žančyna «zanadta narmalna» siabie pavodzić — a značyć, mahčyma, nie prymaje leki,— jaje pieraviali na štomiesiačnyja injekcyi fłupienciksołu, preparata, jaki vykarystoŭvajecca pry lačeńni šyzafrenii i ŭvodzicca tolki pad kantrolem doktara.

«Siamja vyrašyła, što lepš mieć hety jarłyk psichična chvoraj, čym być paviešanaj, trapić u turmu ci być katavanaj. Heta adziny mahčymy šlach zaraz»,— raskazała siabroŭka Darjajei.

Na pytańnie, što budzie, kali jana admovicca ad injekcyj, lekar adkazaŭ: jaje aryštujuć i znoŭ źviažuć u psichijatryčnaj balnicy.

Siońnia 32‑hadovaja Darjajei vučycca na tekstylnuju śpiecyjalnaść u inšym univiersitecie. Pavodle słoŭ jaje siabroŭki, žančyna tłumačyć svoj učynak žadańniem supraćstajać prynižeńniu i pakazać, što jana kantraluje ŭłasnaje cieła i žyćcio:

«Heta ja. Heta majo cieła. Heta majo žyćcio. I kali ja chaču pajści ŭ bikini — ja pajdu ŭ bikini».

Pradstaŭnica iranskaha ŭrada Fateme Muchadžerani ŭ svoj čas admaŭlała jak hvałtoŭny charaktar zatrymańnia, tak i suviaź incydentu ź isłamskim dres-kodam, zajaviŭšy, što «sprava była zusim u inšym» i što «taki ŭzrovień aholenaści niedapuščalny nidzie».

U Iranie z časoŭ Isłamskaj revalucyi 1979 hoda žančyny abaviazanyja pakryvać hałavu i šyju. Za vykanańniem hetaj normy sočyć śpiecyjalna stvoranaja maralnaja palicyja — Hašt-e Eršad.

• 0
• 0
• 0
• 7
• 3
• 16
• 18
• 0