Hetyja krainy publična padtrymlivajuć Infancina, a hetyja — suprać

Publična jaho padtrymali 24 futbolnyja fiederacyi, piša sports.ru.

Voś chto publična padtrymaŭ Infancina

Vosiem udzielnikaŭ ČS-2026: Arhiencina, Maroka, Katar, Jehipiet, DR Konha, Mieksika, PAR i Parahvaj.

Akramia taho, Nihieryja, AAE, Džybuci, Kamorskija Vyspy, Maŭrytanija, Kuviejt, Nihier, Šry-Łanka, Indaniezija, Livan, Butan, Manholija, Filipiny, Hambija, Uhanda, Małavi, Sudan i Banhładeš.

Ale ŭ vypadku z PAR Infancina padtrymaŭ ministr sportu, mastactva i kultury Hejtan Makienzi, a nie futbolnaja fiederacyja.

Šeść kiraŭnikoŭ arabskich asacyjacyj, u tym liku haspadaroŭ ČS-2022 Katara i suarhanizatara ČS-2030 Maroka, apublikavali sumiesnuju zajavu. Jaje taksama padpisali kiraŭniki fiederacyj Jehipta, Livana, Sudana i Maŭrytanii. Čaćviora z šaści padpisantaŭ — katarski šejch Chamad bin Chalifa Al Tani, marakaniec Chani Abo Ryda i kiraŭnik futbolnaha viedamstva Maŭrytanii Achmied Jachja — adnačasova źjaŭlajucca i členami Savieta FIFA.

«My hłyboka cenim pastajannyja namahańni spadara Infancina pa raźvićci futboła va ŭsim śviecie, pašyreńni mahčymaściaŭ va ŭsich rehijonach i ŭmacavańni roli hetaj hulni ŭ abjadnańni ludziej i supolnaściaŭ. Raźličvajem na praciah ciesnaha supracoŭnictva ź im dziela pabudovy bolš mocnaj i kvitniejučaj budučyni suśvietnaha futboła, pašyreńnia mahčymaściaŭ i dalejšaha pavieličeńnia ŭkładu arabskaha futboła na hłabalnaj arenie», — havorycca ŭ sumiesnaj zajavie. Vidavočna, im palityčna vyhadna zachavać Infancina.

Nievialikija fiederacyi (naprykład, Kamory, Uhanda i Małavi) prama tłumačać: im patrebnyja hrošy. Jany ličać, što pry Džani šancaŭ na finansavańnie bolš.

Chto suprać Infancina? Bolš za pałovu arhanizacyj

Brytanski BBC Sport pasprabavaŭ padzialić łahiery.

Bolš za pałovu — mierkavana suprać. Dakładna — 19 členaŭ (siarod ich Hiermanija i Anhlija).

Raźmierkavańnie hałasoŭ:

• Jeŭropa — 55;
• Afryka — 54;
• Azija — 46;
• Paŭnočnaja Amieryka — 35;
• Akijanija — 11;
• Paŭdniovaja Amieryka — 10.

Niepał, 211‑y člen FIFA, ciapier adchileny i nie maje prava hołasu — tamu bieź jaho. BBC uličvaŭ 210 asacyjacyj.

Raskład taki: 124 hałasy — vierahodna, suprać Infancina; 73 hałasy — vierahodna, za Infancina. Plus 13 tych, chto jašče nie vyznačyŭsia. Viadoma, heta nie kančatkovyja ličby. U bližejšyja miesiacy ŭsio jašče moža źmianicca.

Vybary novaha prezidenta FIFA projduć 18 sakavika 2027 hoda. Kali suprać Infancina vystupić adzin apanient, treba nabrać 106 hałasoŭ. Kali kandydataŭ budzie bolš za troch, to ŭ pieršym raŭndzie treba nabrać dźvie traciny hałasoŭ, u druhim — bolšaść.

Chto suprać Infancina — akramia UEFA?

Bolš za ŭsich niezadavolenaja UEFA, jakaja paabiacała razam z nacyjanalnymi asacyjacyjami i inšymi kanfiederacyjami razabracca, jak prajekt prodažu častki pravoŭ na ČS uvohule dajšoŭ da stadyi realizacyi.

Razam z KANKAKAF (Fiederacyja krain Paŭnočnaj i Centralnaj Amieryki) i Azijackaj fiederacyjaj Jeŭropa padpisała list z žorstkaj krytykaj Džani.

Ale ŭ Azii nie ŭsio tak prosta: Katar, AAE, Šry-Łanka, Livan, Kuviejt i Butan padtrymlivajuć Infancina na budučych vybarach. Pryčym mnohija azijackija fiederacyi pakul nie vykazalisia (važnaja Saudaŭskaja Aravija pakul maŭčyć), i voś ich padtrymkaj płanuje zaručycca UEFA.

Futbolnaja kanfiederacyja Akijanii z 11 nacyjanalnych asacyjacyj pakul nie vyznačyłasia sa staŭleńniem da Infancina. Choć pradstaŭnik asacyjacyi Novaj Ziełandyi Endru Prajneł zaklikaŭ krainy Akijanii zaniać «adzinuju pazicyju». U Paŭnočnaj Amierycy taksama mnohija suprać, ale nie ŭsie: za Džani vykazałasia Mieksika. A voś u ZŠA siabra Donalda Trampa nie padtrymali, u adroźnieńnie ad samoha Trampa, jaki nazvaŭ toje, što adbyvajecca, «vialikaj pamyłkaj».

Zatoje na baku Džani Paŭdniovaja Amieryka i Afryka: pieršyja vystupili suprać ździełki, ale zastajucca prychilnikami prezidenta, u Afrycy — adnaznačna za. Navat pisali, što Infancina addaść Maroka finał ČS-2030 u abmien na padtrymku. Ale FIFA ŭsio abvierhła.

Skinuć Infancina ŭsio roŭna budzie składana. Jon nie źbirajecca adstupać

Adzinaj pazicyi UEFA niedastatkova dla pieramohi nad Infancina. U kožnaj nacyjanalnaj asacyjacyi adzin hołas. Tamu Hiermanija, Anhlija, Francyja ci Ispanija majuć takuju ž vahu, jak nievialikija astraŭnyja fiederacyi, jakija atrymlivajuć značnuju častku biudžetu praz prahramy FIFA.

Infancina pabudavaŭ palityčnuju sistemu na pieraraźmierkavańni dachodaŭ na karyść nievialikich krain. Dla mnohich asacyjacyj jon zastajecca kiraŭnikom, pry jakim finansavańnie futboła prykmietna vyrasła. Pakul Afrykanskaja fiederacyja futbołu i KANMIEBOŁ [abjadnoŭvaje fiederacyi krain Paŭdniovaj Amieryki, aproč Surynama, Hajany i Francuzskaj Hviany] zachoŭvajuć łajalnaść, Jeŭropa pavinna znajści kandydata, zdolnaha atrymać padtrymku chacia b u Azii abo KANKAKAF.

U jakaści mahčymaha supiernika čaściej za ŭsio zhadvajuć prezidenta KANKAKAF Viktara Mantaljani. Reuters paviedamlaŭ, što jon razhladaje mahčymaść udziełu ŭ vybarach, ale aficyjna svaju kandydaturu pakul nie vyłučaŭ.

Isnuje i bolš radykalny šlach. Patrabavać praviadzieńnia pazačarhovaha kanhresa FIFA možna pry padtrymcy 43 asacyjacyj. Tearetyčna adnoj Jeŭropie dla hetaha dastatkova hałasoŭ.

Taki kanhres moža pieratvarycca ŭ paŭnavartasnuju sprobu vynieści prezidentu votum niedavieru. Pavodle The Guardian, asobnyja členy Savieta FIFA abmiarkoŭvali padobny scenar jašče da kančatkovaha krachu FIFA Forward Enterprise.

Infancina nie maje namieru adstupać. Jon pa-raniejšamu kantraluje aparat FIFA, asabista pracuje ź fiederacyjami i karystajecca padtrymkaj značnaj častki futbolnaha śvietu. Adnak ciapier jon užo nie vyhladaje biezalternatyŭnym kandydatam.

• 0
• 0
• 0
• 0
• 0
• 0
• 0
• 0