U Minsk budzie lotać luksavaja avijakampanija ź Irana na ŭnikalnym samalocie. Ceny kuślivyja
U Minsk płanuje pačać rehularnyja rejsy iranskaja avijakampanija Atlas Air, jakaja śpiecyjalizujecca na VIP– i čartarnych pieravozkach, piša Blizko.by.
U fłocie Atlas Air 14 samalotaŭ, ale bolšaść ź ich — nievialikija pavietranyja sudny na 3—5 pasažyraŭ. Dla rejsaŭ u Biełaruś najbolšuju cikavaść ujaŭlaje McDonnell Douglas MD-87, jaki pieravozčyk vykarystoŭvaje ŭ raskošnaj VIP-kampanoŭcy.
Hety samalot byŭ pabudavany ŭ 1992 hodzie. Raniej jon pracavaŭ u Japonii ŭ Japan Airlines, paśla vykarystoŭvaŭsia ŭ biznes-avijacyi, a ŭ 2025 hodzie atrymaŭ iranskuju rehistracyju i ŭvajšoŭ u fłot Atlas Air.
U sałonie MD-87 usiaho 25 miescaŭ. Kresły možna raskłaści ŭ paŭnavartasnyja spalnyja miescy, taksama praduhledžanyja asobnaja zona dla pieramoŭ i pryvatnaja prastora. Takaja VIP-kampanoŭka dla MD-87 sustrakajecca vielmi redka, a sam hety typ samalota ciapier amal nie vykarystoŭvajecca ŭ rehijonie.
Samalot Atlas Air užo prylataŭ u Minsk u minułuju niadzielu. Mienavita tady jaho i sfatahrafavali biełaruskija avijacyjnyja amatary.
Prodaž kvitkoŭ užo pačaŭsia. Pieršy rejs pavinien adbycca 16 žniŭnia 2026 hoda, paśla čaho pieraloty płanujuć vykonvać raz na tydzień — pa niadzielach. Pry hetym na sajcie Nacyjanalnaha aeraporta Minsk hetyja rejsy pakul nie adlustroŭvajucca.'
Košt pieralotu davoli vysoki. Kvitok z Tehierana ŭ Minsk kaštuje 179 745 600 iranskich tumanaŭ, a ŭ zvarotnym kirunku — 186 896 600 tumanaŭ.
Tuman — umoŭnaja raźlikovaja adzinka, jakoj u Iranie karystajucca ŭ štodzionnym žyćci. Aficyjnaja valuta krainy — iranski ryjał, pry hetym adzin tuman roŭny dziesiaci ryjałam. Takaja sistema častkova dapamahaje spraścić raźliki na fonie vielmi mocnaj inflacyi i abiasceńvańnia nacyjanalnaj valuty.
Pavodle aficyjnaha kursa Nacbanka Biełarusi, 100 tysiač iranskich ryjałaŭ kaštujuć krychu mienš za 22 biełaruskija kapiejki. Adnak u Iranie isnujuć niekalki kursaŭ valuty — ad aficyjnaha da rynkavaha, jaki značna bližejšy da realnaha koštu ryjała.
Kali pieraličyć košt kvitkoŭ u inšyja valuty, pieralot z Tehierana ŭ Minsk abychodzicca prykładna ŭ 3893 biełaruskija rubli pa kursie Nacbanka Biełarusi. Pavodle aficyjnaha iranskaha kursa heta kala 1173 dalaraŭ, a pa aktualnym rynkavym kursie — kala 961 dalara.
Pieralot ź Minska ŭ Tehieran jašče daražejšy — kala 4048 biełaruskich rubloŭ, abo 1220 dalaraŭ pa aficyjnym iranskim kursie i kala 999 dalaraŭ pa rynkavaj kaciroŭcy.
Kvitok tudy i nazad kaštuje 366 642 200 tumanaŭ, abo 3 666 422 000 ryjałaŭ. Heta prykładna 7941 biełaruski rubiel pa kursie Nacbanka Biełarusi, 2392 dalary pa aficyjnym iranskim kursie abo kala 1960 dalaraŭ pa aktualnym rynkavym kursie.
Takim čynam, havorka idzie nie pra zvyčajny biudžetny avijarejs, a pra vielmi darahuju VIP-pieravozku na redkim samalocie z usiaho 25 miescami.
Raniej, u 2023 hodzie, pramy rehularny rejs pamiž Tehieranam i Minskam užo sprabavała vykonvać iranskaja Mahan Air. Z 2010 pa 2017 hod pamiž dźviuma stalicami taksama lotała «Biełavija».
Kamientary
Kromie toho, Iran užie nieskolko diesiatiletij pod sankcijami, tuda nie postavlajutsia zapčasti dla samoletov, ispolzujutsia libo sobstviennyje iranskije imitacii, libo sieryj import, často tožie ot nieiźviestnych proizvoditielej