Adpačynak u Hruzii: dzie jaho šukać?

Biełaruskaje telebačańnie masiravana rekłamuje adpačynak u Hruzii, u toj čas jak znajści prapanovy ad turfirmaŭ niemahčyma. Rekłama ŭražvaje: sumieś sučasnaści i historyi, jeŭrapiejski ŭzrovień...

«I vy taksama nakont Hruzii? Voś što značyć pakazać narodu pryhožyja karcinki! — supracoŭnik turfirmy «Viaršynia» vidavočna stamiŭsia tłumačyć. — Nichto ŭ Minsku nie robić hrupavych turaŭ u Hruziju. A rekłamu zamoviła ambasada».

Adnak, kali vielmi chočacca, firma prapanuje piersanalnyja tury. Pieralot u abodva baki — 350 dalaraŭ, dzień pražyvańnia na dvaich — 100. Try dni ŭ Tbilisi buduć kaštavać jak uik-end u Stambule.

Turfirmy adčuli na sabie moc rekłamy — u vieraśni płanujecca zapuścić ekskursijny tur u Tbilisi, a paśla adpačynak na harnałyžnych kurortach, jakimi Hruzija słaviłasia zaŭždy. Ciapier, pa słovach śpiecyjalistaŭ, nie najlepšy siezon dla ekskursij — u Tbilisi staić haračynia, i ad hetaha cierpić vielmi bahataja ekskursijnaja prahrama.

Dzie žyć?

Dalacieć da Tbilisi kaštuje ad 195 jeŭra ( dla paraŭnańnia: stolki ž kaštuje avijakvitok da Stambuła, a bilet u Sočy abydziecca biełarusu ŭ 140 jeŭra). Rejs ad «Biełavija» Minsk — Tbilisi štodzionny.

Vybar hatelaŭ u Hruzii taksama bahaty — ad trochzorkavych za 100 dalaraŭ, da piacizorkavych za 200. Heta, što tyčycca Tbilisi. Košty ŭ kurortnych hatelach vyšejšyja — numar na dva miescy ŭ dvuchzorkavym hateli ŭ Batumi abydziecca ŭ $170.

A numar na dva miescy ŭ hateli hornaha kurorta Hudaury budzie kaštavać 100 dalaraŭ u dzień. Na druhim najviadomiejšym hornym kurorcie Hruzii, Bakuryjani, vybar hatelaŭ pa koštach pavinien zadavolić luboha turysta: ad $80 za numar u samym centry kurorta.

Pry nieabchodnaści administracyja hatela arhanizuje tranśfier z aeraporta Tbilisi, tamu prablemy dabracca da kurorta niama. Tym bolš što braniravać hatel lepš zahadzia — popyt na ich vialiki, i adrazu vyrašyć pytańnie tranśfieru.

Bolšaść hatelaŭ majuć internet-sajty z poŭnaj infarmacyjaj. Paraŭnać košty, zabraniravać numary možna na «ahulnych» sajtach, kštałtu: http://www.advantour.com/rus/georgia/hotels.

Što hladzieć?

Badaj, samaje składanaje pytańnie. U Hruzii stolki słavutych miaścin, na jakija varta zirnuć, što vybrać najvybitniejšyja amal niemahčyma. U pieršuju čarhu varta pahladzieć staruju častku Tbilisi i staražytnuju stalicu Mcchietu. A bolš za ŭsio vam pašancuje, kali jość hruzinskija znajomyja, kaža vydaviec Uładzimir Siŭčykaŭ, jaki vučyŭsia ŭ Hruzii. Jany abaviazkova zvoziać vas u svaje rodnyja miaściny i tam pakažuć i raskažuć usio. Sp. Uładzimir dahetul uzhadvaje, jak chadziŭ na hruzinskija dni naradžeńnia.

Varta zazirnuć u Adžaryju — samy samabytny rajon Hruzii, a taksama naviedać Kutaisi. Treba zaznačyć, što pa kolkaści histaryčnych pomnikaŭ i słavutych miescaŭ Hruzija adnosicca da najbolš bahatych krain śvietu.

• 0
• 0
• 0
• 0
• 0
• 0
• 0
• 0