Viarchoŭny kamisar AAN pa pravach čałavieka vykazała hłybokuju zakłapočanaść pryhavoram Parfiankovu

Viarchoŭny kamisar AAN pa pravach čałavieka Navanietchiem Piłej vykazała hłybokuju zakłapočanaść pryhavoram Vasilu Parfiankovu, jaki byŭ pryhavorany da čatyroch hadoŭ pazbaŭleńnia voli ŭ kałonii strohaha režymu pa abvinavačańni va ŭdziele ŭ masavych biesparadkach u Minsku 19 śniežnia.

«Sudovy pieraśled i pakarańnie asabliva tryvožnyja z ulikam taho, što razam ź dziasiatkami inšych aktyvistaŭ jon paŭstaŭ pierad sudom za realizacyju svajho prava na svabodu mirnych schodaŭ i vykazvańnia», — pryvodzić słovy Piłej sajt Upraŭleńnia viarchoŭnaha kamisara AAN pa pravach čałavieka.

Pavodle jaje słoŭ, utrymańnie pad vartaj palityčnych apanientaŭ, pieraśled hramadzianskaj supolnaści i zapałochvańnie niezaležnych ŚMI źjaŭlajecca surjoznym parušeńniem pravoŭ čałavieka.

Piłej adznačyła, što ŭ Biełarusi terminy i ŭmovy ŭtrymańnia pad vartaj da suda nie adpaviadajuć standartam Mižnarodnaha pakta ab hramadzianskich i palityčnych pravach. U pryvatnaści, skazała jana, pytańnie ab praciahu terminu ŭtrymańnia pad vartaj vyrašaje prakuror, a nie sudździa.

«My taksama atrymali infarmacyju ab tym, što praciahvajecca zapałochvańnie advakataŭ, jakija akazvali pravavuju dapamohu zatrymanym i žurnalistam», — skazała viarchoŭny kamisar. Jana źviarnuła ŭvahu na toje, što Ministerstva justycyi Biełarusi anulavała licenzii sama mieniej trom advakatam, jakija «abaraniali lidaraŭ apazicyi i žurnalistku».

Piłej zajaviła ab praciahu palityčnaha i administracyjnaha nacisku na pravaabaroncaŭ i NDA, uklučajučy aryšty, dopyty, vobyski, kanfiskacyju materyjałaŭ, zapałochvańni z metaj niedapuščeńnia kantaktaŭ ź mižnarodnymi i mižuradavymi arhanizacyjami.

«Pravaabaroncy pavinny mieć mahčymaść vykonvać svaju pracu ŭ biaśpiečnym asiarodździ, nie ryzykujučy saboj i nie bajučysia represij, zapałochvańnia, pahroz i čaplańnia jarłykoŭ, — padkreśliła Piłej. — Dziaržavy pavinny abaraniać pravaabaroncaŭ, žurnalistaŭ i hramadzianskuju supolnaść ad pahroz, pomsty i nacisku, jakija źjaŭlajucca vynikam ich zakonnaj dziejnaści pa abaronie pravoŭ čałavieka».

Navanietchiem Piłej zaklikała biełaruskija ŭłady vyzvalić palitźniavolenych, u tym liku byłych kandydataŭ u prezidenty, i vykonvać mižnarodnyja abaviazacielstvy ŭ halinie pravoŭ čałavieka. Jana adznačyła adsutnaść naležnaha supracoŭnictva pamiž Biełaruśsiu i Kamitetam AAN pa pravach čałavieka.

Situacyju ŭ Biełarusi 13 lutaha ŭ Maskvie abmierkavali Navanietchiem Piłej i pradstaŭniki mižnarodnaj nahladalnaj misii Kamiteta mižnarodnaha kantrolu za situacyjaj z pravami čałavieka ŭ Biełarusi.

Kamisaru byli pieradadzienyja materyjały misii pa stanoviščy pravaabaroncaŭ, advakataŭ i žurnalistaŭ u Biełarusi, padrychtavanyja sumiesna ź biełaruskimi arhanizacyjami.

Piłej paviedamiła, što sočyć za situacyjaj u Biełarusi. Jana vykazała hatoŭnaść uvažliva vyvučać materyjały i rekamiendacyi pa palapšeńni stanovišča z pravami čałavieka ŭ Biełarusi, paviedamili BiełaPAN pradstaŭniki misii.

19 lutaha Alaksandr Łukašenka zajaviŭ, što «plavać chacieŭ» na kamientary Zachadu. «Heta złyja i nieprystojnyja ludzi», — skazaŭ jon.

• 0
• 0
• 0
• 0
• 0
• 0
• 0
• 0