I.Chalip: Ad taho, što sudździa nie pabačyć Paryž, moj muž na voli nie akažacca

Žurnalistka Iryna Chalip, žonka palitviaźnia, eks-kandydata na prezydenta Andreja Sańnikava, jakaja sama była asudžanaja za Płošču da dvuch hadoŭ pazbaŭleńnia voli z adterminoŭkaj pakarańnia na dva hady, kamentuje zajavu Łukašenki pra mahčymaść vyzvaleńnia palityčnych źniavolenych.

Alaksandar Łukašenka nia vyklučyŭ mahčymaści vyzvaleńnia viaźniaŭ, jakija mieli dačynieńnie da padziejaŭ 19 śniežnia. Iryna, jakaja była vaša pieršaja reakcyja na hetuju zajavu Alaksandra Łukašenki?

Chalip: Uvohule nijakaj. Ja stolki ŭžo čuła hetych zajavaŭ: naprykład, pra toje, što my ŭsie pad padpiskaj pra niavyjezd, pra toje, što jon nia moža dačakacca, kab my ŭsie źjechali adsiul - paśla taho, jak źjechaŭ Michalevič, i šmat čaho jašče. Tamu ja nijak nie reahuju.

Što da tych "dvaich, jakija ŭ avanhardzie išli" - praŭdapadobna, majucca na ŭvazie dva eks-kandydaty na prezydenta Andrej Sańnikaŭ, asudžany na piać hadoŭ turmy, i Mikoła Statkievič, jaki ciapier za kratami, jamu pahražaje da 8 hadoŭ turmy, prysud budzie vyniesieny zaŭtra. Dyk voś Mikoła Statkievič u svaim apošnim słovie źviarnuŭsia da eŭrapiejskich dyplamataŭ z zaklikam: «Nia treba prapanoŭvać režymu hrošy za našu svabodu. Kali vy zrobicie heta, u nas buduć novyja zakładniki». Jak vy ličycie: ciapier, paśla zajavaŭ Łukašenki pra mahčymaść vyzvaleńnia viaźniaŭ Zachad iznoŭ budzie vykupać zakładnikaŭ? Ci daduć za palitviaźniaŭ novyja kredyty?

Chalip: Ja dapuskaju, što Zachad usprymie hetuju zajavu jak niejki syhnał i, napeŭna, nakiruje ŭ adkaz svoj syhnał. Moža, navat niejki nie vidavočny, a tajemny, štości na ŭzroŭni telefonnych razmovaŭ ci sustreč na ŭzroŭni nie Łukašenki, a MZS. Ale mnie zdajecca, što zaŭtrašni prysud i budzie vielmi cikavy jak dadatkovy syhnał. Kali jon hatovy vyzvalać palitviaźniaŭ, dyk, napeŭna, jon moža heta zrabić užo zaŭtra. Kali hetaha nia budzie zroblena, dyk jaki sens abmiarkoŭvać zajavy čałavieka, dla jakoha skazać što-niebudź - heta takaja ž narmalnaja źjava, jak dla astatnich - padumać, pierš čym skazać?

Śviatłana Kalinkina ŭ artykule ŭ «Narodnaj voli» vykazałasia nakont taho, što Zachad słušna ciapier nia ŭvodzić ekanamičnyja sankcyi, pakolki ŭ takim vypadku ŭłady abvinavacili b u ekanamičnych prablemach Zachad i apazycyju, a tak ludzi zrazumiejuć, chto nasamreč vinavaty ŭ ciapierašnim kryzysie. Ci vy zhodnyja sa Śviatłanaj Kalinkinaj?

Chalip: Ja ź joj zhadžajusia, jana, mnie zdajecca, usio vielmi razumna i słušna piša. A što da sankcyjaŭ - viadoma ž, jany patrebnyja. Prosta tamu, što hety śpis tych, kamu zabaronieny ŭjezd u krainy EZ - heta śmiechu varta, davajcie budziem ščyrymi. Łukašenka nieŭjazny, dyk jon budzie tolki dziakavać EZ za toje, što toj robić nieŭjaznymi ŭ svaje krainy jašče paru socień čałaviek: "Voś ja nie mahu pajechać, dyk i vy nia zmožacie!" Chutka ŭsia kraina nia budzie nikudy jeździć. Mnie, jak čałavieku, pryjemna, što sudździa Brysina, jakaja mianie sudziła, nikoli nie pabačyć ni Rymu, ni Paryžu. Ale moj muž na voli ad hetaha nie akažacca.

Kali siońniašnija zajavy pra mahčymaść vyzvaleńnia palitviaźniaŭ buduć mieć praciah zaŭtra ŭ sudzie, i, mahčyma, paśla hetaha budzie vyzvaleny i Andrej Sańnikaŭ, kamu vy budziecie ŭdziačnaja za hetaje vyzvaleńnie?

Chalip: Usiamu cyvilizavanamu śvietu. Ja maju na ŭvazie i Zachad: ZŠA, Eŭropu, i navat Uschod, tamu što paśla prysudu Andreju Sańnikavu ŭpieršyniu za 20-hadovuju historyju MZS Rasiei ŭsio ž zrabiła niejkuju zajavu.

Jakaja samaja apošniaja infarmacyja pra Andreja Sańnikava? Kali vy možacie mieć nastupnaje spatkańnie? Ci dachodziać listy?

Chalip: Ja spadziajusia, što na nastupnym tydni ŭ mianie budzie novaje spatkańnie. Listy dachodziać, spatkańnia ja čakaju, i spadziajusia, što Andrej chutka vyjdzie na svabodu

• 0
• 0
• 0
• 0
• 0
• 0
• 0
• 0