Miedyki zaniepakojenyja rostam liku biełaruskich padletkaŭ z zališniaj vahoj. Pra heta paviedamiła namieśnik dyrektara Respublikanskahanavukova-praktyčnaha centra hihijeny Iryna Zaścienskaja 25 žniŭnia na pasiadžeńni kruhłaha stała ŭ Minsku.
Pavodle jaje słoŭ, pa dadzienych daśledavańnia minskich škoł, zališniuju vahu majuć čverć padletkaŭ. Čaściej jana nazirajecca ŭ dziaŭčynak z pryčyny ich fizijałahičnych asablivaściaŭ. U 10–13% staličnych školnikaŭ vyjaŭlena atłuścieńnie.
Ź minułaha hoda pa ŭsioj Biełarusi pravodzicca asobnaje daśledavańnie pa acency atłuścieńnia ŭ dziaciej. Hetu pracu płanujecca zaviaršyć u nastupnym hodzie. Daśledavańnie dazvolić vyznačyć, nakolki raspaŭsiudžana adchileńnie vahi ŭ dziaciej i padletkaŭ z tym, kab rekamiendavać na dziaržaŭnym uzroŭni miery, jakija buduć pieraškadžać raspaŭsiudžvańniu hetaj tendencyi.
Zaścienskaja ličyć, što pryčyna pavieličeńnia liku biełaruskich padletkaŭ z zališniaj vahoj — dastupnaść charčovych praduktaŭ u spałučeńni z adsutnaściu kultury charčavańnia.
Pavodle jaje słoŭ, možna vyłučyć dva asnoŭnyja kirunki ŭ baraćbie z zališniaj vahoj: karekcyja charčavańnia i pavieličeńnie fizičnaj nahruzki. Pastajanna ŭnosiacca karektyvy ŭ školnaje mieniu. «U škołach zabaranili kołu, adychodziać ad čypsaŭ, rekamiendujem sadavinu i aharodninu, rekamiendujem pradavać u škołach soki, — skazała Zaścienskaja. — My pilna sočym, kab nie było pierahibu ŭ bok vuhlavodnaha charčavańnia».
Pavodle słoŭ śpiecyjalista, dla schilnych da paŭnaty ludziej taksama abaviazkova pavieličeńnie raschodu enierhii. Dzieciam rekamiendujecca chadzić u škołu pieššu, naviedvać spartyŭnyja siekcyi. U pierśpiektyvie miedyki zacikaŭleny va ŭkaranieńni ŭ Biełarusi aptymalnaha płanavańnia haradoŭ. U pryvatnaści, kancepcyja Suśvietnaj arhanizacyi achovy zdaroŭja «Zialony horad» praduhledžvaje, što kožny haradžanin pavinien mieć mahčymaść na praciahu 15 chvilin biez vykarystańnia transpartu dabracca da zialonaj zony, a taksama mieć dostup da biaspłatnych spartyŭnych zbudavańniaŭ.
Respublikanski
Kamientary