Eŭrapiejskaja Kamisija apublikavała daśledvańnie, što aśviatlaje suviaź pamiž šmatmoŭjem i vynikami eŭrapiejskaha biznesu.
23 lutaha Eŭrapiejskaja Kamisija apublikavała daśledvańnie, što aśviatlaje suviaź pamiž šmatmoŭjem i vynikami eŭrapiejskaha biznesu.
«Było b pamyłkaj ličyć, što investavańnie ŭ vyvučeńnie zamiežnych movaŭ źjaŭlajecca niepažadanymi vydatkami dla biznesu», — prakamentavaŭ padzieju Eŭrapiejski Kamisar pa pytańniach šmatmoŭja Leanard Orban. «Naadvarot, padobnaje investavańnie moža značna pavysić biznes‑mahčymaści kampanii», — padkreśliŭ Kamisar. «Ja chacieŭ by zrabić šmatmoŭje adnym z hałoŭnych pryncypaŭ Lisabonskaj stratehii, nakiravanaj na stymulavańnie rostu i zaniataści ŭ EZ», — padkreśliŭ spadar Orban.
Daśledvańnie «Nastupstvy niedastatkovych viedaŭ zamiežnych movaŭ na pradpryjemstvach dla eŭrapiejskaj ekanomiki» było praviedzienaje pa zamovie Eŭrapiejskaj Kamisii brytanskim Nacyjanalnym linhvistyčnym centram. Padčas daśledvańnia byŭ praanalizavany ŭzrovień viedaŭ zamiežnych movaŭ na 2000 małych i siarednich pradpryjemstvach EZ, infarmacyju dapoŭnili dadzienyja 30 multynacyjanalnych kampanijaŭ, vysnovy ekspertaŭ pa asobnych dziaržavach i daśledvańni kankretnych prykładaŭ.
Zhodna z vynikami daśledvańnia, pradpryjemstvy, što planujuć vyjści na novyja mižnarodnyja rynki, niačasta investujuć srodki ŭ prahramy vyvučeńnia zamiežnych movaŭ. Čaściej za ŭsio jany šukajuć supracoŭnikaŭ, jakija ŭžo majuć moŭnyja navyki.
Na dumku Kamisii, taki padychod usio mieniej adpaviadaje vyklikam sučasnaj ekanomiki. U ciapierašniaj ekanamičnaj sytuacyi biznes i instytuty EZ pavinny bolš investavać u vyvučeńnie zamiežnych movaŭ i raźvićcio navykaŭ mižkulturnaj kamunikacyi.
Niahledziačy na važnaść anhielskaj movy dla dziełavych znosinaŭ, vyniki daśledvańnia śviedčać pra toje, što ŭsio bolšuju vahu nabyvajuć inšyja eŭrapiejskija movy (niamieckaja, francuzskaja, hišpanskaja), a taksama kitajskaja, arabskaja i rasiejskaja.
Kamientary