Paŭnočnakarejskaja rakieta razvaliłasia praz chvilinu paśla zapusku

Paŭnočnakarejskaja rakieta, na jakoj Pchieńjan abiacaŭ dastavić na arbitu štučny spadarožnik Ziamli, razvaliłasia praz chvilinu paśla zapusku. Za puskam rakiety sačyli słužby Japonii, ZŠA i Paŭdniovaj Karei. Japonija była hatova źbić rakietu, kali b jana skiravałasia ŭ bok astravoŭ.

Pradstaŭniki Pientahona paviedamili, što rakieta navat nie zmahła pakinuć miežaŭ atmaśfiery.

Aficyjny Sieuł, u svaju čarhu, paviedamlaje, što abłomki rakiety ŭpali ŭ paŭdniovakarejskija terytaryjalnyja vody, kala paŭdniova-zachodniaha ŭźbiarežža krainy.

Žurnalisty telekampanij, akredytavanych u Pchieńjanie, paviedamlajuć, što na tvarach paŭnočnakarejskich čynoŭnikaŭ była prykmietnaja tryvoha i navat panika ŭ toj momant, kali zachodnija ŚMI raspaviali pra niaŭdały zapusk rakiety.

KNDR ažyćciaviła zapusk u 7.39 pa časie Sieuła (1.39 u Minsku). Žurnalisty CNN, zaprošanyja ŭ Pchieńjan ŭładami KNDR dla demanstracyi abjektaŭ dla zapusku rakiety, zajavili, što aficyjnyja asoby Paŭnočnaj Karei nie papiaredzili ich ab pusku.

Dla abmierkavańnia situacyi vakoł dziejańniaŭ Paŭnočnaj Karei, u piatnicu ŭ Ńju-Jorku źbiarecca Rada biaśpieki AAN. Rasija taksama asudziła pusk rakiety karejcami, jaki parušaje rezalucyi Rady Biaśpieki AAN.

Paŭnočnaja Kareja raspracavała atamnuju bombu i aktyŭna raspracoŭvaje mižkantynientalnyja balistyčnyja rakiety.

Zapusk rakiety pavinien byŭ stać kulminacyjaj śviatkavańnia 100-hodździa z dnia naradžeńnia Kim Ir Sena, zasnavalnika dynastyi.

Niezvyčajnaść momantu była ŭ tym, što Pchieńjan pryznaŭ niaŭdaču. Try raniejšyja anałahičnyja puski taksama byli niaŭdałymi, ale ŭ dvuch z troch vypadkaŭ ułady pry Kim Čen Iru zajaŭlali, što spadarožniki vyviedzieny na arbitu i tranślujuć «revalucyjnyja himny».

Ekśpierty havorać ab tym, što paŭtorny niaŭdały zapusk śviedčyć pra słabaść rakietnaj prahramy Paŭnočnaj Karei.

«Navukoŭcy, inžyniery i śpiecyjalisty ciapier vyśviatlajuć pryčyny avaryi», — zajaviła paŭnočnakarejskaje ahienctva CTAK u kamunikacie, jaki byŭ začytany taksama na dziaržaŭnym telebačańni.

Vajskoŭcy Paŭdniovaj Karei ciapier sprabujuć sabrać abłomki rakiety ŭ mory kala ŭźbiarežža.

Na pabudovu rakiety byli vytračany sotni miljonaŭ dalaraŭ. Heta prytym što ŭ Paŭnočnaj Karei miljony ludziej niedajadajuć, a kraina ŭvieś čas prymaje charčovuju dapamohu ad Paŭdniovaj Karei, ZŠA i Kitaja. U vyniku pastajannaha niedajadańnia źmienšyŭsia navat siaredni rost karejcaŭ. Niadaŭna stała viadoma, što ŭłady Karei źnizili minimalny rost, pry jakim biaruć na vajskovuju słužbu, da 145 santymietraŭ.

Raniej Kareja vyrablała najpraściejšyja rakiety, skapijavanyja z savieckich uzoraŭ 1960-ch hadoŭ.

• 0
• 0
• 0
• 0
• 0
• 0
• 0
• 0