Ułada z apazycyjaj zhulali ŭničyju
Uładam nie ŭdałosia marhinalizavać śviatkavańnie Dnia Voli ŭ Miensku. Heta było — z ulikam usich pieraškodaŭ — dastatkova šmatludnaje šeście. Ale palityčnym kreatyvam arhanizatary nie skazać kab blisnuli. Pierad apazycyjaj vostra staić prablema stratehii. Piša ŭ svaim błohu Alaksandar Kłaskoŭski.
Takim čynam, uładam nie ŭdałosia marhinalizavać śviatkavańnie Dnia Voli ŭ Miensku. Heta było — z ulikam usich pieraškodaŭ — dastatkova šmatludnaje šeście. Ale palityčnym kreatyvam arhanizatary nie blisnuli. Pierad apazycyjaj vostra staić prablema stratehii.
Napiaredadni šmatkroć paŭtaryli, što heta test dla ŭładaŭ pierad Eŭropaj. Masavaja častka akcyi abyšłasia biez asablivaj brutalnaści, ale kazać, što ŭłady nadta ŭžo vystrenčvali pierad zamiežnikami, nie vypadaje. Nijaki test zdavać jany, padobna na toje, i nie źbiralisia. Adpracavali pavodle zvykłaj ŭžo technalohii.
Preventyŭnaja začystka — raz, siońniašni "presynh pa ŭsioj placoŭcy" — dva. Narešcie, sproby apazycyjnaj moładzi dapiać da "ałmazu viedaŭ", dzie ładziłasia aficyjoznaja impreza, natknulisia na łancuh siłavikoŭ. Kali pišucca hetyja radki, praciahvajuć pastupać źviestki pra incydenty. Biez huzakoŭ i zatrymańniaŭ, zdajecca, usio ž nie abyšłosia. Voś vam i kansalidacyja...
Ale, tak ci inačaj, śviata adbyłosia.
Palitolah Uładzimir Roŭda adznačaje dyscyplinavanaść, adkaznaść udzielnikaŭ akcyi — "kožnuju klumbu abychodzili". Adnak jon ličyć, što mitynh dia Akademii navuk atrymaŭsia nia nadta natchnialnym. I nie tamu, što pałovu pramoŭ zahłušyli milicejskija dynamiki. Narod pačaŭ pakrysie razychodzicca jašče raniej.
"Usio było čakana, tradycyjna, — kaža Roŭda. — Apazycyja nie prademanstravała niejkaha noŭ-chaŭ". Jon miarkuje, što na kolkaści ŭdzielnikaŭ adbiłasia nia tolki preventyŭnaja začystka, ale i toje, što ciaham hodu pracy z nasielnictvam, pra jakuju stolki kazali, amal što nie było.
Zavitaŭšy potym na plac la Nacyjanalnaj biblijateki, ja znoŭ pieražyŭ adčuvańnie, što siońnia ŭ roznych vymiareńniach suisnujuć dźvie Biełarusi. Całkam suverennyja :) U ich roznyja ściahi. U ich nasielnikaŭ roznaje śvietaadčuvańnie.
Ale ž kraina ŭ nas adna. I siońnia jana na ciažkim skryžavańni.
Pierad apazycyjaj vostra staić prablema stratehii. Ci padoryć mocnyja idei čarhovy kanhres, na debaty vakoł jakoha spalena ŭžo stolki porachu, — vialikaje pytańnie.
Zrešty, palitolah Valer Karbalevič miarkuje, što chacia chibaŭ u apazycyi sapraŭdy staje, ale siońnia jana abjektyŭna nia moža mocna ŭpłyvać na chadu padziejaŭ.
Dyk što, puhaj abucha nie pierabješ?
Karbalevič miarkuje, što na toj abuch chutčej zdolnyja paŭpłyvać niejkija vonkavyja dy ekanamičnyja čyńniki.
Ale ž i momant kryzy apazycyja moža sustreć pa-roznamu! Padčas minułaj naftahazavaj vajny ŭ jaje jak movu adniało, chacia što da palityčnaha pijaru momant byŭ vyklučna vyjhryšny.
To bok pytańnie mabilizavanaści zastajecca.
Ja ž siońnia z zadavalnieńniem hladzieŭ na moładź.
Jaje było na akcyi šmat. I kolki b ni ładziłasia dobraachvotna-prymusovych imprezaŭ z papsoj, pseŭdafalkloram i pacham smažniaŭ, — jaje, moładź, kiroŭnyja viarchi ŭsio adno prajhrajuć.
Nu a siońnia ŭłada z apazycyjaj, badaj što, zhulali ŭničyju.
Kamientary