Viestki ź Litvy
Litoŭcy padtrymali Šareckaha
Paśla sustrečy z kaleham V.Łandsberhisam, jaki staršyniuje ŭ litoŭskim sejmie, staršynia Viarchoŭnaha Savietu Biełarusi 13-ha sklikańnia Siamion Šarecki atrymaŭ dvuch achoŭnikaŭ. Siońnia S.Šarecki, zmušany ŭciakać ad nielehitymnaha Łukašenki, žyvie i pracuje ŭ Vilni. Adnyja kažuć, što jon tam jak pryvatny turyst, a druhija — što jak vykanaŭca abaviazkaŭ kiraŭnika Respubliki Biełaruś pavodle Kanstytucyi, — kamu jak vyhadniej. Litoŭskim parlamentaram vyhadniej razhladać jaho jak kiraŭnika. Tamu z pačatkam vosieńskaj sesii ŭ sejmie Litvy budzie zarehistravanaja admysłovaja parlamenckaja hrupa pa suviaziach z raspuščanym Viarchoŭnym Savietam Biełarusi. Pra heta paśla sustrečy z S.Šareckim zajavili deputaty sejmu Litvy Rytas Kupčynskas, Saŭlus Piačalunas i Ihnacas Uždavinis.
Krychu bolej vina i piva
«Naša Niva» pisała niejak, što litoŭcy na pamiežnych pierachodach, dzie niama mytni, prymušajuć, kali jedzieš ź Biełarusi, vylivać harełku i vino, a dzie mytnia jość — tam viazi tolki paŭlitra harełki, vina i piva. Ciapier krychu liberalizavali hetaje dzieła. Možna ŭžo dva litry piva i dva litry vina. Darečy, biełaruskaje piva niekatorym lepš smakuje za litoŭskaje, bo choć tam i sotni tych hatunkaŭ, ale naš napoj ščylniejšy, huściejšy, nie taki hazavany i maje mienš hołaha śpirtu.
Košty na rynku
Na papularnym vilenskim rynku «Hala», kala čyhunačnaha vakzału, dzie biełaruskija ciotki štodnia vystrojvajucca radkom z raskładzienymi na ziamli małočnymi praduktami, tajemna dastaŭlenymi z Baćkaŭščyny, na minułym tydni košty charčoŭ byli nastupnyja (u litach za kilahram/litar, u adnym dalary — čatyry lity, to bo za adzin lit — 112 tysiač našych rubloŭ):
jajki — 1,60-2,00
alej — 4-6,00
sieladcy z hałovami — 5,20-3,90
žyvy karp — 7,70-7,50
cukar — 3,00
muka 2 kh — 3,20
kava «Jasobs» — 250 h — 9,50-9
razynki — 7-6,50
ziemlanyja arechi — 4,00-5,00
pamidory — 2,00
časnyk (hałoŭka) — 0,70
cybula — 1,30-0,80
morkva — 2,00
buraki — 0,80-1,00
bulba — 0,70-1,00
kapusta — 0,50-1,00
jabłyki (papiaroŭki) — 1-1,50
banany — 2,30
miod — 19,00
słoičak chrenu 200 h — 2,00
Kab dobra paraŭnoŭvać, treba viedać, što minimalny zarobak u Litvie krychu bolšy za 400 litaŭ, što značyć, za sto dalaraŭ.
Kažuć, sioleta ŭ paraŭnańni ź letašnim nadta stańnieŭ miod, byccam hety hod miodam ažno płyvie.
Kamientary