Adam Hlobus
Našy sučaśniki
1975. Plačkoŭ i son
Kab nie iści ŭ vojska, skulptar Plačkoŭ pačynaje nia spać. Jon nia śpić try dni, a potym idzie ŭ vajenkamat z čyrvonymi, jak u marskoha akunia, vačyma. Vajenlekar ahladaje pryzyŭnika Plačkova j kaža, kab jon pajšoŭ i vyspaŭsia. Plačkoŭ sprabuje symulavać varjactva, ale biassońnie tak kasuje jaho siły, što j na symulacyju mocy nie staje. Praź dzień paśla medahladu Plačkoŭ sustrakaje mianie j kaža: “Treba było nia spać nia try, a dva dni, i ŭsio atrymałasia b”.
1982. Jafimaŭ i rukapis
Zdaju ŭ vydaviectva svoj rukapis ź vieršami. Recenziju daručajuć pisać Chviedaru Jafimavu. Ja pryjaždžaju da jaho na ŭskrainu Miensku, na vulicu Charkaŭskuju. My siadzim u maleniečkim pakoi j havorym pra Bunina. “Buninu lahčej. U jaho jość viera i Boh. Pamiataješ?.. K miłosierdnym koleniam pripav…” Ja vieru Jafimavu, sapraŭdy, Boha, taho, što byŭ u Bunina, u mianie niama.
1994. Vaškievič i milicyjant
Mastak-satyryk Rusłan Vaškievič biare čarku z kalehami. Nahružvajecca jon da takoj stupieni, što sychodzić z chaty ŭ adnych škarpetkach. Ciopleńkaha jaho znachodzić na prypynku milicyjant. Ale adbyvajecca dziva, milicyjant nie vyklikaje chmielavozu i nia ciahnie Rusłana ŭ pastarunak. Jon supravadžaje niebaraku nazad da viasiołych kalehaŭ. “Heta vaš chłopčyk?” — pytajecca dobry dziadźka ŭ furažcy. —“Naš! Naš!” —“Zabiarycie j nie puskajcie na dvor biez abutku!” Voś taki źniešni vyhlad maje karykaturyst Vaškievič u 28 hadoŭ, navat milicyjanty prymajuć jaho za dzicia.
2000. Kožuch i vino
Žyvapisiec Uładzimier Kožuch u maładości złoŭžyvaŭ mocnym čyrvonym vinom, piŭ vermut za rubiel dvaccać dźvie kapiejki. Tvar u Kožucha byŭ taki malinavy, što vałasy vyhladali ažno smarahdava-zialonymi. I karciny tych časoŭ mieli adpaviedny kalaryt. Nia viedaju jak, ale Ŭładzimier kinuŭ pić. Ciapier tvar u jaho śvietły, barada srebnaja j karciny piaščotna-blakłyja. Usie zadavolenyja. Mnie padabaŭsia i padabajecca Kožuch časoŭ “čarnilnych” zapojaŭ, bo ŭ mastactvie akramia śvietlini musibyć jakiści iracyjanalny prysmak, chaj sabie j spravakavany najprymityŭniejšym alkaholem.
2000. Viačorka i šeści
Restaŭratar ad movaznaŭstva Vincuk Viačorka ładzić marš pratestu j viadzie ludziej na bałotny plac Banhałor. Raniej Vincuka možna było nazvać palitykam novaj chvali. A paśla taho Maršu jon staŭ palitykam bałotnaj chvali.
Ciapier čytajuć
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1717
Kamientary