Z 1 studzienia staŭki arendnaj płaty dla bolšaści pradprymalnikaŭ i biznes-strukturaŭ źniziacca. A voś dla turfirmaŭ dy ryełtaraŭ jany mohuć pabolšać.
Arenda składaje vialikuju dolu raschodaŭ kožnaha pradpryjemstva, jakoje nia maje ŭłasnych pamiaškańniaŭ. Bolšaja častka ofisnych budynkaŭ naležyć dziaržavie. Mechanizm vyznačeńnia arendnaj płaty za karystańnie dziaržaŭnaj nieruchomaściu prapisany ŭ prezydenckim ukazie №495, pryniatym sioleta 30 vieraśnia. Hety dakument admianiŭ analahičny, jaki dziejničaŭ z 1996 h. Miascovyja ŭłady musiać pierazaklučyć damovy z arandatarami da 1 studzienia.
Pamier arendnaj płaty vyličvajecca zychodziačy ź vieličyni bazavaj staŭki. Hetuju ličbu pamnažajuć na kaeficyjent ad 0,1 da 20 — usio zaležyć ad stanu pamiaškańnia, najaŭnaści telefona dy inšych kamunikacyjaŭ, a taksama ad vidu dziejnaści.
Kali stary ŭkaz vyzvalaŭ ad arendnaj płaty biudžetnyja arhanizacyi, dyk novy daje mahčymaść nie płacić za arendu navat biznesoŭcam. Kali vy majecie hrošy, ale nia viedajecie, u jakuju spravu ich ukłaści, naładžvajcie charčavańnie dla dziaciej u sadkach ci jakich navučalnych ustanovach — arendy z vas nia voźmuć. Ad arendy vyzvalajuć taksama pradprymalnikaŭ, jakija zajmajucca vydańniem dy prodažam knižak, źviazanych z adukacyjaj, navukaj dy kulturaj, pry hetym realizacyja kulturnickaj pradukcyi musić składać bolš za 50% ad ahulnaha abjomu vytvorčaści. Kab vyzvalicca ad arendy, možna stvaryć pracoŭnyja miescy “na zamovu” Mienharvykankamu ci adpaviednaha abłvykankamu.
Zusim nievialikuju arendu (bazavuju staŭku, pamnožanuju na kaeficyjent 0,1) buduć płacić biznesoŭcy, jakija majuć siarod svaich pracaŭnikoŭ 50% i bolš invalidaŭ. Na pamianšalny kaeficyjent 0,4 majuć prava niedziaržaŭnyja adukacyjnyja ŭstanovy, a taksama biznesoŭcy, što zajmajucca hramadzkim charčavańniem (kali nacenka na stravy nia bolšaja za 70%), pobytavym absłuhoŭvańniem, utrymlivajuć apteki ci majuć kramy, što handlujuć urazdrob. Ničoha takoha ŭ starym ukazie 1996 h. nie było. Adnak ekanamičnaja liberalizacyja tut vielmi j vielmi adnosnaja: kali arendu za pieraličanyja vyšej rečy źnizili bolš čym u dva razy, dyk biznes, źviazany z turyzmam, ryełtarskimi pasłuhami, ciapier, zhodna z novym ukazam, praduhledžvaje kaeficyjenty ad 1,5 až da 20.
A.K.
daviedka “NN”
Pamiery bazavych stavak arendnaj płaty vyznačajucca ŭ eŭra. Najmienš biaruć za płoščy, jakija vykarystoŭvajucca dla vytvorčaści. Najbolšyja staŭki arendy ŭ Miensku. U stalicy pamier bazavaj staŭki dla vytvorčych pamiaškańniaŭ roŭny 5 eŭra, dla płoščaŭ źmiešanaha vykarystańnia – 7 eŭra, nievytvorčaha vykarystańnia – 10 eŭra. U abłasnych centrach i Babrujsku – adpaviedna 2,5; 4; 6. U mienšych nasielenych punktach bazavyja staŭki vahajucca ad 0,5 (Bieraściejščyna, vioska, pamiaškańni dla vytvorčaha vykarystańnia) da 5,4 eŭra (Homielščyna, harady z nasielnictvam zvyš 100 tys. čałaviek, pamiaškańni dla nievytvorčaha vykarystańnia). Krytery vyznačeńnia stavak roźniacca pa abłaściach. Tak, na Haradzienščynie, Viciebščynie j Mienščynie ŭ asnovu pakładzieny administracyjny pryncyp: usie nasielenyja punkty, u jakich tearetyčna moža žyć arandatar, padzialajucca na harady abłasnoha i rajonnaha padparadkavańnia, pht dy “inšyja”. Na Homielščynie staŭka zaležyć ad kolkaści nasielnictva – u asobnyja hrupy vydzielenyja harady za 100 tys. čałaviek, 50–100 tys., da 50 i vioski. Voś dzie staŭki raśpisanyja padrabiazna, dyk heta na Mahiloŭščynie. Tam harady kožnaje hrupy pieraličanyja “pajmienna”. Najbolšyja staŭki ŭ Kryčavie, Horkach i Asipovičach. Jość navat asobnaja staŭka dla rabočych pasiołkaŭ, kštałtu Hłušy ci Jalizava. Samyja nizkija staŭki arendy ŭ katehoryi nievialikich haradoŭ i viosak na Haradzienščynie, samyja vysokija – na Homielščynie i Mahiloŭščynie.
Ciapier čytajuć
Na aŭtašou ŭ Lidzie ledź nie zahinuŭ adzin z samych znakamitych kaskadzioraŭ Biełarusi — jaho videa sabrali amal paŭmiljarda prahladaŭ. Što ź im ciapier?4
Kamientary