Пракуратура Брэста падала пазоў аб ліквідацыі «Польскай школы» з-за справы «аб гераізацыі ваенных злачынцаў»
Пазоў аб ліквідацыі ТАА «Польская школа» падала пракуратура Берасця ў сувязі з «грубым парушэннем заканадаўства, што пацягнула прычыненне шкоды дзяржаўным і грамадскім інтарэсам», паведамляе Tut.by са спасылкай на прэс-службу.
«Пад выглядам аказання інфармацыйных і культурна-адукацыйных паслуг з удзелам не менш за 20 непаўналетніх навучэнцаў і маладых берасцейцаў праслаўляліся вайсковыя злачынцы, уключаючы Рамуальда Райса, вядомага па мянушцы Буры», — паведамляе прэс-служба пракуратуры.
Гаворка ідзе аб несанкцыянаваным масавым мерапрыемстве, якое прайшло ў «Польскай школе» 28 лютага.
10 сакавіка па факце «здзяйснення групай асоб наўмысных дзеянняў, накіраваных на ўзбуджэнне нацыянальнай і рэлігійнай варожасці і варожасці па прыкмеце нацыянальнай, рэлігійнай, моўнай і іншай сацыяльнай прыналежнасці, а таксама наўмысных дзеянняў па рэабілітацыі нацызму» была заведзена крымінальная справа па ч. 3 арт. 130 КК.
У межах крымінальнай справы затрымалі сузаснавальніка «Польскай школы» — 43-гадовага берасцейца — і дырэктара Ганну Панішаву, якая вярнулася ў Беларусь пасля камандзіроўкі ў Польшчу. Яны праходзяць па справе як падазраваныя. Паводле інфармацыі Tut.by, праз некаторы час сузаснавальніка адпусцілі, а дырэктар усё яшчэ знаходзіцца пад вартай.
Часовы павераны ў справах Польшчы ў Беларусі Марцін Вайцяхоўскі раней распавёў, што мерапрыемства ў «Польскай школе» «не мела ніякага дачынення» да Рамуальда Райса (Бурага).
Каментары