Новая прэзідэнтка Венгрыі асудзіла ўварванне Расіі ва Украіну. Яна з партыі Орбана
Новаабраная прэзідэнтка Венгрыі Каталін Новак падчас цырымоніі інаўгурацыі, якая адбылася сёння, асудзіла расійскае ўварванне ва Украіну і падтрымала ўступленне Украіны ў Еўрапейскі Саюз. Пра гэта паведаміла венгерскае выданне Telex.
Каталін Новак падчас інаўгурацыі на плошчы. Фота: Huszti István / Telex
Паводле Telex, прэзідэнтка выказала стаўленне Будапешта да расійска-ўкраінскага канфлікту ў дзесяці тэзах:
- Мы асуджаем пуцінскую агрэсію, узброены напад на суверэнную дзяржаву.
- Мы назаўжды скажам «не» ўсім намаганням аднавіць Савецкі Саюз.
- Мы, венгры, хочам міру тут і ў суседніх краінах, мы хочам міру, а не вайны.
- Мы патрабуем расследавання і пакарання ваенных злачынстваў.
- Мы не нейтральныя, мы на баку нявінных ахвяраў і праўды. Мы выконваем свае абавязальніцтвы ў рамках ЕС і НАТА, але калі гэтага запатрабуюць венгерскія інтарэсы, мы скажам не.
- Ні пры якіх абставінах мы не хочам адмаўляцца ад свайго суверэнітэту, за які неаднаразова змагаліся, і пастаянна развіваем нашы абарончыя сілы.
- Мы падтрымліваем уступленне Украіны ў Еўрапейскі Саюз.
- Мы гатовыя ахвяраваць дзеля міру і не будзем перашкаджаць дапамозе нашых саюзнікаў, але мы не пагодзімся на рашэнні, якія патрабуюць ад венграў больш ахвяраў, чым шкоды, якую яны наносяць расійскаму агрэсару.
- Мы радыя быць пасярэднікам паміж бакамі вайны.
- Мы настойваем на забеспячэнні правоў венграў, якія жывуць ва Украіне, як раней, так і цяпер.
Венгерскі парламент выбраў Каталін Новак на пасаду прэзідэнта 10 сакавіка. Яна стала першай жанчынай на гэтай пасадзе ў гісторыі краіны.
Новак уваходзіць у склад кіруючай партыі Венгрыі «Фідэс», якую ўзначальвае прэм'ер-міністр Віктар Орбан. Раней яна займала пасаду міністра па справах сям'і.
Цяпер чытаюць
Чаму ў беларускай турме так моцна худзеюць? Тлумачым8
Каментары