Гурбангулы Бердымухамедаў выдаў кнігу па-беларуску

«Выбраны і ўпаўнаважаны народам». Так называецца эксклюзіўная кніга на беларускай мове прэзідэнта Туркменістана Гурбангулы Бердымухамедава. Яе прэзентацыя днямі адбылася ў Мінску ў начным клубе «Брадвей».

Прэзентацыя, праўда, прайшла ў вячэрні час і была прымеркаваная да адкрыцця ў беларускай сталіцы мясцовага культурна‑асветнага фонду «Бахар», што ў перакладзе з туркменскай мовы азначае вясна. Фонд створаны прадстаўнікамі туркменскай дыяспары ў Беларусі для садзейнічання збліжэнню двух народаў, узаемаўзбагачэння іх культур, паглыблення супрацоўніцтва ў розных сферах, у тым ліку і ў эканамічнай. І сваю высакародную дзейнасць фонд пачаў з прэзентацыі кнігі туркменскага лідара.

У ёй, у прыватнасці, ён аддае даніну павагі туркменскай духоўнай спадчыне, багатаму гістарычнаму мінуламу свайго народа, акрэслівае планы развіцця краіны на найбліжэйшую і далёкую перспектыву, гаворыць пра маштабныя праекты, якія зменяць да лепшага жыццё туркменаў.

Некалькі слоў аб аўтары кнігі. Гурбангулы Мялікгулыявіч Бердымухамедаў нарадзіўся ў 1957 годзе ў сяле Бабараб Ашхабадскай вобласці Туркменіі. У 1979 годзе скончыў стаматалагічны факультэт Туркменскага медыцынскага інстытута, а ў 1990 годзе — аспірантуру. Кандыдат медыцынскіх навук. Працоўны шлях пачаў у 1979 годзе стаматолагам у паліклініцы Ашхабада. І далей значная частка яго жыцця была прысвечана лячэнню людзей. Будучы прэзідэнт Туркменіі працаваў стаматолагам у сельскай амбулаторыі, галоўным пазаштатным стаматолагам Ашхабадскага раёна, загадчыкам стаматалагічнага аддзялення Цэнтральнай раённай бальніцы ў Ашхабадскім раёне. Далейшы шлях Гурбангулы Бердымухамедава (1990—1995 гг.) быў звязаны з навукай: асістэнт кафедры тэрапеўтычнай стаматалогіі, дацэнт, дэкан стаматалагічнага факультэта Туркменскага дзяржаўнага медыцынскага інстытута.

У 1997 годзе быў вылучаны на пасаду міністра аховы здароўя і медыцынскай прамысловасці Туркменістана, потым адначасова ўзначальваў дзяржаўны медыцынскі інстытут і міжнародны медыцынскі цэнтр у Ашхабадзе. З 2001 года працаваў намеснікам старшыні Кабінета міністраў. У 2007 годзе Гурбангулы Бердымухамедаў абраны прэзідэнтам Туркменістана. Нягледзячы на вялікую занятасць, знайшоў час для стварэння кнігі.

Гэта, дарэчы, не першая кніга прэзідэнта туркменскай дзяржавы, якая была прапанавана ўвазе беларускай грамадскасці. Нагадаем, некалькі гадоў таму ў памяшканні Беларускага таварыства дружбы і культурнай сувязі з замежнымі краінамі адбылася прэзентацыя кнігі першага туркменскага прэзідэнта Сапармурата Ніязава «Рухнама». Яго суайчыннікі яшчэ называлі «Вялікім Туркменбашы», «Вялікі Сардарам», што значыць правадыр.

Кніга Сапармурата Ніязава таксама была перакладзена на беларускую мову і прысвячалася слаўнай гісторыі туркменскага народа, сённяшняму дню дзяржавы. «Рухнама» ў поўным сэнсе слова стала настольнай кнігай усіх туркменаў, яе вывучалі ў школах, вышэйшых навучальных установах. «Рухнаму» пераклалі на многія замежныя мовы. Трэба сказаць, што ў Туркменістане з вялікай павагай ставяцца да твораў сваіх лідараў. Сапармурат Ніязаў кіраваў краінай на працягу 15 гадоў. Пасля яго раптоўнай смерці была выдадзеная кніга запаветаў Туркменбашы, якую так і назвалі «Мае запаветы». У кнігу ўвайшлі вытрымкі са шматлікіх выступленняў і артыкулаў Туркменбашы, а таксама фрагменты з яго гісторыка‑філасофскіх прац і паэтычных твораў.

Цяпер грамадскасць нашай краіны мае магчымасць на беларускай мове пазнаёміцца з кнігай прэзідэнта Туркменістана Гурбангулы Бердымухамедава. «Выбраны і ўпаўнаважаны народам» таксама перакладзена на замежныя мовы, яе прэзентацыя прайшла ў многіх краінах, у тым ліку Вялікабрытаніі, Галандыі, Расіі. У кнізе шмат прыгожых і цікавых ілюстрацый, якія сведчаць пра вялікія дасягненні Туркменістана пасля набыцця самастойнасці.

• 0
• 0
• 0
• 0
• 0
• 0
• 0
• 0