Лукашэнка арыентуе КДБ на барацьбу з карупцыяй: Камерцыйныя структуры знішчаць, а чыноўнікаў — на нары
Аляксандр Лукашэнка сёння ў час кадравых назначэнняў строга папярэдзіў аб недапушчальнасці якіх-небудзь парушэнняў з боку кіраўнікоў, паведамілі ў прэс-службе беларускага лідара.
«У сувязі з тым, што я даручыў займацца пытаннямі антыкарупцыйных дзеянняў, мне ўсё больш і больш дакладваюць аб ненармальнай дзейнасці асобных нашых кіраўнікоў. Рашэнні будуць імгненнымі і адназначнымі. І не будзе таго, што вось гэта простае парушэнне, — ну, папаляваў чалавек, забіў ён ласяня або дзіка, давайце яму даруем. Ну, а вось тут у энергетыцы сотні мільёнаў долараў страчана з прычыны нясвоечасовасці ўводу энергамагутнасцей або нерацыянальнага выкарыстання інвестыцыйных сродкаў, вось гэта сапраўды злачынства. Не, у абодвух выпадках — злачынствы, і па кожным — свой артыкул».
Аляксандр Лукашэнка прывёў канкрэтны прыклад: «Як мне цяпер далажылі праваахоўныя органы, па паляўнічай справе ўжо (менавіта так, напэўна, яе назавуць журналісты) у следчым ізалятары паўдзясятка людзей. Усе з партфелямі кіраўнікоў. Я гэта кажу не таму, што не трэба вам паляваць. Палюйце, але ведайце час, месца, і з кім вы гэта будзеце рабіць».
Самае галоўнае — усё павінна быць сумленна і па законе. «Не будзе па законе, ну што ж, тады вы самі выбралі гэты шлях. Тое самае і ў энергетыцы, і ў дрэваапрацоўцы, і гэтак далей. У адваротным выпадку мы страцім краіну. Мы апусцімся да таго ўзроўню, на які скаціліся некаторыя суседнія з намі краіны былога Савецкага Саюза», — адзначыў кіраўнік дзяржавы.
«Я ўжо нядаўна сказаў і паўтару яшчэ раз публічна: калі толькі мне будзе даложана, што нейкі чыноўнік, не толькі вашага ўзроўню кіраўнік, заблытаўся з камерцыйнай структурай у будаўніцтве ці то лазні, ці то яшчэ якога-небудзь гаспадарчага памяшкання ў сябе, гэта нескладана правяраецца, значыць, камерцыйная структура знішчаецца, а чыноўнік ідзе на нары. Гэта не запалохванне людзей, я проста вас усіх папярэджваю».
Цяпер чытаюць
17‑гадовы хлопец жыве ў падвале. Ён загарнуўся ў чырвона-зялёны сцяг, каб Лукашэнка звярнуў на яго ўвагу26
Каментары