За парты ў гэтай унікальнай установе адукацыі сядуць 17 хлопчыкаў і дзяўчынак, у асноўным з праваслаўных сем’яў.
Як паведаміў БелаПАН адказны за сувязі са СМІ мінскіх духоўных акадэміі і семінарыі іерэй Сергій Каравінскі, гэты праект рэалізуецца ў рамках дагавора аб супрацоўніцтве паміж Беларускім экзархатам Рускай праваслаўнай царквы і Міністэрствам адукацыі. Паводле яго слоў, за парты ў гэтай унікальнай установе адукацыі сядуць 17 хлопчыкаў і дзяўчынак ва ўзросце 6 гадоў, у асноўным з праваслаўных сем’яў. Гімназія размяшчаецца ў двухпавярховым будынку былога дзіцячага садка, што адноўлены намаганнямі Свята‑Мікола‑Сафійскага прыходу, які з’яўляецца заснавальнікам навучальнай установы. Навучальны працэс будзе праходзіць па вучэбных планах пачатковай школы Міністэрства адукацыі, у якія ўключаны ўрокі Закону Божага і асновы праваслаўнай культуры. Тэрмін навучання ў гімназіі — чатыры гады. «Навучальная ўстанова атрымала статус гімназіі, паколькі па традыцыі ў гэтай навучальнай установе з ухілам на духоўнае выхаванне вывучаецца Закон Божы. У наступным годзе, магчыма, набор у першы клас будзе значна большы, што дазволіць адкрыць два першыя класы», — сказаў С.Каравінскі.
Паводле яго слоў, настаяцель гімназіі пратаірэй Аляксій Канаплёў і дабрачынцы стварылі ўсе неабходныя ўмовы для паспяховага навучання і выхавання юных гімназістаў «на аснове культурных каштоўнасцей беларускага народа і хрысціянскай спадчыны». Тым не менш, як зазначыў С.Каравінскі, навучанне ў гімназіі будзе ажыццяўляцца на рускай мове. Паводле яго слоў, выкладанне беларускай і замежных моў будзе весціся ў рамках праграмы пачатковай рускамоўнай школы. Як паведаміў іерэй, гімназія мае ўтульныя класы, актавую залу, бібліятэку, трапезную і дворык.
У дзень адкрыцця навучальнай установы адбудзецца асвячэнне гімназічнага храма ў гонар найпадобнай мучаніцы Лізаветы. На вучобу дзяцей благаславіў архірэй правялебны Серафім, епіскап Бабруйскі і Быхаўскі. Адбудзецца ўзнагароджанне асоб, якія ўзялі актыўны ўдзел у стварэнні гімназіі. На першы званок запрошаны прадстаўнікі Магілёўскага аблвыканкама, уладаў Бабруйска, Беларускага дзяржаўнага універсітэта і Мінскай духоўнай акадэміі.
Каментары