«Потым будзем успамінаць Прыгожына як героя». Хакеры апублікавалі меркаваную перапіску Бабіча і Пяскова
Хакерская група Black8Mirror заявіла, што атрымала архіў расійскага чыноўніка, былога пасла Расіі ў Беларусі Міхаіла Бабіча і апублікавала некалькі фрагментаў яго меркаванай перапіскі з прэс-сакратаром Уладзіміра Пуціна Дзмітрыем Пясковым.
Паводле Black8Mirror, архіў Бабіча займае больш за 21 ГБ і змяшчае матэрыялы за перыяд з 2020 года да жніўня 2026-га. У адкрытым доступе хакеры размясцілі толькі асобныя фрагменты і скрыншоты.
Міхаіл Бабіч — былы паўнамоцны прадстаўнік прэзідэнта Расіі ў Прыволжскай федэральнай акрузе і былы пасол Расіі ў Беларусі (2018-2019). З 2021 года — намеснік дырэктара расійскай Федэральнай службы вайскова-тэхнічнага супрацоўніцтва.
«Чысты экспромт» Такаева
Адзін з апублікаваных фрагментаў адносіцца да 25‑26 ліпеня 2026 года.
25 ліпеня падчас сустрэчы з Пуціным у Омску прэзідэнт Казахстана Касым-Жамарт Такаеў нечакана закрануў вайну ва Украіне. Ён заявіў, што яе прырода «не зусім зразумела» многім, у тым ліку Казахстану, і прапанаваў «замарозіць» канфлікт.
У перапісцы, апублікаванай Black8Mirror, Бабіч пытаецца ў суразмоўцы, пазначанага як Дзмітрый Пяскоў, ці быў выступ Такаева ўзгоднены загадзя.
«Чысты экспромт», — адказвае той і дадае, што Такаева «нехта папрасіў гэта сказаць». Вось толькі пытанне, хто: «украінцы, амерыканцы ці нехта знутры».
«Ну так бяспечна»
Прапіска працягваецца на наступны дзень, калі ў Санкт-Пецярбургу адзначалі Дзень ВМФ. Святкаванне другі год запар прайшло без галоўнага ваенна-марскога параду ў Пецярбургу.
26 ліпеня Пуцін прыехаў на аўтамабілі ў Галоўнае Адміралцейства. Замест традыцыйнага агляду караблёў Пуціна вітала рота ганаровай варты, а перад маракамі ён выступаў у двары Адміралцейства на фоне вялікага банера з выявай атамнай падводнай лодкі.
У апублікаванай перапісцы «Бабіч» рэзка крытыкуе фармат мерапрыемства:
«У засраным дворыку Адміралцейства замест мора — банер, замест войскаў — рота ганаровай варты з сухапутных салдат… Дзіма, хто гэтую хрэнь прыдумаў, куды яны яго цягнуць…»
«Пяскоў» адказвае:
«Ну дык бяспечна».
«Наўрад ці можна дапамагчы самагубцу»
Найбольш цікавы з апублікаваных Black8Mirror фрагментаў датуецца 24 мая 2023 года, прыкладна за месяц да мяцяжу ПВК «Вагнер» і за тры месяцы да гібелі Яўгена Прыгожына.
У перапісцы «Бабіч» перасылае суразмоўцу тэкст з пераказам выказванняў Прыгожына. У ім гаворыцца, што зняволенне Аляксея Навальнага, на думку кіраўніка «Вагнера», «разбэсціла» карумпаваных чыноўнікаў. Раней яны нібыта баяліся трапіць у расследаванні Навальнага, што ўскладняла ім выкарыстанне скрадзеных грошай.
На скрыншоце гэты тэкст выглядае як перасланае паведамленне ад Мікалая Пятрова. Такія ж імя і прозвішча мае вядомы расійскі палітолаг. Пры гэтым аналіз выдання паказаў, што сам тэкст паходзіць з тэлеграм-канала «ЕЖ», які ў маі 2023 года называўся Brief. Адпаведны пост пазней быў выдалены.
На перасланы тэкст акаўнт «Пяскова» адказвае:
«Трагедыя ў тым, што ўсё гэта праўда. І ўсе мы так ці інакш пра гэта гаворым… Толькі лічыцца, што пра гэта нельга гаварыць публічна».
Далей размова пераходзіць непасрэдна да Прыгожына. «Пяскоў» піша:
«Навошта ён гэта робіць, не ведаю. Пазаўчора гадзіну з ім скандаліў. Ужо бессэнсоўна. Ён лічыць, што ўсё настолькі дрэнна, што трэба нешта рабіць…»
«Бабіч» адказвае, што яму «ўпершыню здаецца, што ён мае рацыю», і пытаецца, ці не варта «пачаць яму дапамагаць».
У адказ «Пяскоў» піша:
«Наўрад ці можна дапамагчы самагубцу. Потым будзем успамінаць яго як героя і расказваць пра яго дзецям».
Паводле апублікаванага скрыншота, гэтая размова адбылася 24 мая 2023 года.
За дзень да яе, 23 мая, было апублікавана вялікае інтэрв'ю Прыгожына. У ім ён, сярод іншага, сцвярджаў, што замест заяўленай «дэмілітарызацыі» Расія фактычна спрыяла мілітарызацыі Украіны, а таксама разважаў пра ролю расследаванняў Навальнага ў стрымліванні карупцыі.
Роўна праз месяц пасля даты на скрыншоце Black8Mirror, 24 чэрвеня, сілы ПВК «Вагнер» занялі вайсковыя аб'екты ў Растове-на-Доне і рушылі ў бок Масквы. Мяцеж закончыўся ў той жа дзень пасля дамоўленасцяў аб спыненні руху калон.
23 жніўня 2023 года Прыгожын загінуў падчас катастрофы самалёта ў Цвярской вобласці.
Што цяпер з італьянскімі візамі? Масавыя адмовы? Турфірмы называюць альтэрнатыву6
Што цяпер з італьянскімі візамі? Масавыя адмовы? Турфірмы называюць альтэрнатыву
«Калі б я быў следчым КДБ, я б падкрэсліў тое самае». Фядута — пра схаваныя сэнсы «Каласоў пад сярпом тваім», увагу сілавікоў да свайго рукапісу і загадку з трэцяй часткай рамана Караткевіча1212
Каментары
Бабки и договорняки похоронили русский патриотический прагматизм.