«Прашу ахвяраваць гэты дзень Беларусі»

Лідэр Руху «За Свабоду» Аляксандр Мілінкевіч звярнуўся да грамадзянаў Беларусі ў сувязі з правядзеннем 14 кастрычніка Еўрапейскага Маршу «За Свабоду» з заклікам прыняць у ім удзел.

Прапануем Вашай увазе тэкст звароту.

«Грамадзяне Беларусі!

14 кастрычніка галоўным праспектам сталіцы пройдзе Еўрапейскі Марш.

Гэта будзе Марш дзеля будучай свабоднай і еўрапейскай Беларусі. Гэта будзе пачатак нашага шляху ў свабодную і аб'яднаную Еўропу.

Звяртаюся да ўсіх: прыйдзіце на праспект і прадэманструйце сваю волю да Свабоды, свой еўрапейскі выбар.

Прашу жыхароў гарадоў і вёсак ахвяраваць гэты дзень Беларусі — вашай краіне, якую вы так любіце. Прыедзьце на Пакроў у сталіцу. Адчуйма разам дух і моц Свабоды.

Дзяўчаты і хлопцы! На цябе, наша моладзь, надзея! Слухайце сваё сумленне, рабіце дабро і нічога не бойцеся.

«Гэта будзе Марш дзеля будучай Беларусі, пачатак нашага шляху ў свабодную і аб’яднаную Еўропу», — гаворыцца ў звароце.

Маніфестацыі — самы эфектыўны спосаб барацьбы за свабоду. Седзячы ў хаце — нічога не даб’емся. Трэба выходзіць! Столькі, колькі спатрэбіцца, каб вызваліць саміх сябе. Няма іншай рады. Так рабілі іншыя народы Еўропы. Сябры Беларусі з розных краінаў Еўропы прыедуць 14 кастрычніка ў Мінск, будуць разам з намі.

Звяртаюся да палітычных партыяў і грамадскіх арганізацыў, да кожнага: няхай побач са сцягамі Еўрасаюзу ў гэты дзень лунаюць нашы светлыя нацыянальныя сцягі, няхай на дэманстрацыі гучыць нацыянальная мова. Няхай на плакатах і лозунгах будуць адлюстраваныя нашы думкі.

Звяртаюся і да тых, хто падтрымлівае цяперашні палітычны і эканамічны курс: прыйдзіце на галоўны праспект. Мы адна нацыя. У нас роўныя правы і супольная будучыня. Мы — еўрапейцы! Мы — гаспадары дзяржавы, мы — крыніца ўлады. Не будзе багатай і шчаслівай тая краіна, дзе грамадзянаў трымаюць за рабсілу. Падтрымайце еўрапейскі выбар для Беларусі!

«Маніфестацыі — самы эфектыўны спосаб барацьбы за свабоду. Седзячы ў хаце — нічога не даб’емся. Трэба выходзіць! Столькі, колькі спатрэбіцца, каб вызваліць саміх сябе. Няма іншай рады».

Кожны год увесну грамадзяне выходзяць на вуліцу ў Дзень Волі 25 Сакавіка. Няхай ад гэтага году Пакроў, 14 кастрычніка, стане Днём еўрапейскага выбару беларусаў.

Ад свабоды выйграюць усе. Нават тыя, хто цяпер яе баіцца.

Вяртанне ў свабодную і заможную Еўропу — гарантыя захавання нашай незалежнасці і культуры, развіцця эканомікі, росту дабрабыта.

Будзем разам 14 кастрычніка!

Разам – да еўрапейскай будучыні Беларусі, будучыні нашых дзяцей і ўнукаў.

Аляксандр Мілінкевіч»

• 0
• 0
• 0
• 0
• 0
• 0
• 0
• 0