«Мы чакаем любой прапановы ад Беларусі ці іншай кампаніі» — заявіў намеснік генеральнага дырэктара Уралкалія Джон Маргетс у інтэрв’ю Wall Street Journal.
«Мы адкрытыя да любога легальнага супрацоўінцтва, выгаднага для збыту і цэнаў. Мы практычныя людзі і дзейнічаем у інтарэсах нашых акцыянераў», — заявіў Маргетс.
Паводле яго, як «Уралкалій», так і «Беларуськалій» выйгралі ад сумеснага маркетынгу і збыту прадукцыі з моманту заснавання Беларускай калійнай кампаніі ў 2005 годзе.
Маргетс таксама паведаміў, што рада дырэктараў «Уралкалія» не надта хацела разрываць стасункі з «Беларуськаліем». Аднак да такіх дзеянняў іх змусілі відавочныя доказы таго, што беларуская кампанія прадае вялікія аб’ёмы прадукцыі ў абыход супольнага трэйдэра.
Атрымаць камэнтар ад кіраўніцтва «Беларуськалія» не ўдалося — піша Wall Street Journal
«Уралкалій» страсянуў рынак калійных угнаеньняў, абвясціўшы 30 ліпеня пра разрыў супрацоўніцтва з «Беларуськаліем» і паабяцаўшы зніжаць цану на прадукцыю, адначасова павялічыўшы яе вытворчасць. У адказ на заяву «Уралкалія» Беларусь арыштавала генеральнага дырэктара кампаніі Уладзіслава Баўмгертнера. З 26 жніўня ён знаходзіцца ў СІЗА КДБ.
16 верасня стала вядома, што Баўмгертнера могуць выдаць Расіі. Гэта стала магчыма пасля таго, як беларускі бок прыняў рашэнне вылучыць матэрыялы адносна расійскіх грамадзянаў, якія праходзяць па «калійнай справе», у асобную вытворчасць і перадаць іх у Генпракуратуру Расіі.
Каментары