Украіна з 2014 года дала грамадзянства 52 беларускім добраахвотнікам
З пачатку расійскай агрэсіі супраць Украіны ўкраінскае грамадзянства атрымалі 52 беларускія добраахвотнікі, якія ваявалі на баку Украіны. Яшчэ 22 справы беларусаў ужо перададзеныя на разгляд Камісіі пры прэзідэнце Украіны па пытаннях грамадзянства. Пра гэта паведаміла Дзяржаўная міграцыйная служба Украіны ў адказ на запыт выдання «Суспільне».
Да пачатку поўнамаштабнага расійскага ўварвання грамадзянства Украіны атрымалі 12 беларускіх добраахвотнікаў, а пасля лютага 2022 года — яшчэ 40.
У чэрвені 2025 года Вярхоўная Рада Украіны ўнесла змены ў заканадаўства аб атрыманні і захаванні грамадзянства. Для іншаземцаў, якія служаць ва ўкраінскіх Сілах абароны, спрасцілі ўмовы. Цяпер, каб атрымаць права прэтэндаваць на грамадзянства, ім дастаткова праслужыць паводле кантракту адзін год замест ранейшых трох.
Звычайна разгляд заявы аб прыняцці грамадзянства, калі не патрабуецца дадатковая праверка, павінен займаць не больш за восем месяцаў. Пры гэтым заявы іншаземцаў, якія ўдзельнічалі або ўдзельнічаюць у абароне Украіны, разглядаюцца ў прыярытэтным парадку.
Беларускія добраахвотнікі, якія ваююць на баку Украіны, а таксама іх сямейнікі могуць легалізаваць сваё знаходжанне ва Украіне нават з пратэрмінаваным беларускім пашпартам. Яны могуць атрымаць дазвол на жыхарства або падаць дакументы на грамадзянства. Аднак для гэтага неабходна мець арыгінал дакумента.
У міграцыйнай службе адзначаюць, што для многіх беларускіх добраахвотнікаў замена пашпарта немагчымая без вяртання ў Беларусь, што можа быць небяспечна для іх. Пры гэтым выразнага механізму аднаўлення беларускага пашпарта ва Украіне пакуль няма.
Каб вырашыць гэтую праблему, Дзяржаўная міграцыйная служба распрацавала адпаведны законапраект і перадала яго ў Міністэрства ўнутраных спраў для ўзгаднення. Пакуль жа замежныя вайскоўцы, якія засталіся без асноўнага дакумента, могуць звярнуцца па статус уцекача альбо асобы, якая мае патрэбу ў дадатковай абароне.
Акрамя таго, з мая да жніўня 2026 года часовыя дазволы на жыхарства ўпершыню або пры абмене атрымалі 45 грамадзян Беларусі, якія служаць ва ўкраінскіх Сілах абароны.
Улік такіх дакументаў пачалі весці з мая. Раней замежным добраахвотнікам для пацвярджэння законнасці знаходжання ва Украіне было дастаткова вайсковага білета і кантракта. Цяпер усе дзейныя замежныя вайскоўцы Сіл абароны Украіны павінны прайсці працэдуру легалізацыі да 10 лістапада 2026 года.
Украінцы, якія ваявалі за Расію і былі ўзятыя ў палон, расказалі, чаму працягваюць яе любіць
«Хуліганства з выкарыстаннем зброі». Новы інцыдэнт з беларусам-добраахвотнікам ва Украіне
Пра што маўчыць Аляксей Францкевіч, якому Польшча закрыла ўезд на 10 гадоў
Удава беларускага добраахвотніка здолела сабраць подпісы пад петыцыяй аб прысваенні іншаземцам звання Героя Украіны
Беларусы без пашпартоў ва Украіне ў жніўні рызыкуюць стаць нелегаламі — яны не змогуць абнавіць ДНЖ
Каментары