Закон набывае моц 24 кастрычніка, але адлік пачынаецца на 10 месяцаў раней — з 1 студзеня.
За першыя дзевяць месяцаў 2013 года ДАІ злавіла каля 30 тысяч нецвярозых кіроўцаў. Ад 24 кастрычніка ўсе яны аўтаматычна стануць патэнцыйнымі кандыдатамі на канфіскацыю аўтамабіля. Згодна з новым законам, такое пакаранне будзе ўжывацца супраць тых, каго ловяць п'яным за рулём другі раз.
ДАІ будзе адлічваць перыяд ужывання санкцый з 1 студзеня 2013 года.
З ростам колькасці ўласнікаў аўтамабіляў п'яныя за рулём сталі сапраўднай бядой для Беларусі. Машыны сталі даступнымі па цане для людзей самых розных звычак. А паскарэнне рытму жыцця ў краіне прывяло да таго, што людзі сядаюць за стырно ў кожным разе.
Між тым у п'яных зніжаецца рэакцыя і адэкватнасць. У выніку гінуць або робяцца інвалідамі людзі, у тым ліку дзеці. Гэта і выклікала неабходнасць прыняцця стражэйшых караў за выпіўку.
Закон «Аб кіраванні транспартным сродкам у нецвярозым стане» прадугледжвае павелічэнне штрафаў за першую паездку нецвярозым да 50—100 базавых велічынь. На сёння гэта адпаведна 6,5—13 мільёнам рублёў.
У кіроўцы, які затрыманы выпіўшы другі раз на працягу года, аўтамабіль будуць канфіскоўваць. Прычым незалежна ад таго, хто з'яўляецца ўласнікам машыны. Асабліва злосных парушальнікаў будуць садзіць у турму.
Каментары