За генеральнага дырэктара «Уралкалія» Уладзіслава Баўмгертнера, які 21 лістапада быў экстрадаваны ў Расію, выкуп у памеры 100 млн. долараў ЗША не выплачваўся, паведаміла газета «КоммерсантЪ» са спасылкай на свае крыніцы.
21 кастрычніка на сустрэчы з рэдактарамі СМІ СНД Аляксандр Лукашэнка заявіў, што топ-менеджар расійскай кампаніі будзе выдадзены Расіі толькі пасля кампенсацыі нібыта нанесенага Беларусі ўрону.
Крыніцы «Коммерсанта» мяркуюць, што Лукашэнку задаволіла змена асноўнага ўладальніка «Уралкалія», якой ён дамагаўся.
Рашэнне аб экстрадыцыі было прынятае праз тры дні пасля афіцыйнай аб'явы аб продажы Фондам Сулеймана Керымава ўсіх акцый, якія належалі яму, групе «Анэксім» Міхаіла Прохарава і ўладальніку хімічнай кампаніі «Уралхім» Дзмітрыю Мазепіну. Гэтага ўраджэнца Мінска лічаць бізнесменам, блізкім да беларускага кіраўніка.
Прадстаўнікі «Уралкалія» вызваленне Баўмгертнера каментаваць не сталі. Адна з крыніц заявіла, што экстрадыцыя абвінавачванага стала «добрай воляй» Лукашэнкі пасля заявы пра хуткую змену акцыянера. Іншы суразмоўца газеты адзначыў, што дамоўленасці пра гэта былі дасягнутыя раней на «больш высокім некарпаратыўным узроўні».
Каментары