Ураджэнец Берасцейшчыны, ён дзесяцікласнікам быў асуджаны на 25 гадоў лагераў за «антысавецкую дзейнасць».
На 82-м годзе жыцця памёр грамадскі дзяяч і пісьменнік Уладзімер Леанюк (Володимир Леонюк). Сумная вестка прышла з Львова, дзе ён жыў.
Уладзімер Леанюк нарадзіўся ў 1932 г. у сялянскай сям'і ў вёсцы Крытышын (Брэсцкая вобл., Іванаўскі раён).
У 1951 г., калі ён вучыўся ў апошнім класе сярэдняй школы, яго арыштавалі за антысавецкую дзейнасць (распаўсюджваў антысавецкія рукапісныя ўлёткі, напісаныя па-ўкраінску).
Вайсковы трыбунал войск МУС Пінскай обласці асудзіў юнака на 25 год зняволення.
Пасля смерці Сталіна яго вызвалілі.
Другі раз ён трапіў у савецкі канцлагер за стварэнне незалежніцкай арганізацыі ўжо пры Хрушчову.
Адбываючы пакаранне ў лагерах Інты і затым у Мардовіі, выдаваў, рэдагаваў і распаўсюджваў падпольную літаратуру, стаў адным з аўтараў «Інструкцыі аб правілах канспірацыі пры распаўсюдзе рэвалюцыйнай літаратуры», браў удзел у стварэнні і працы падпольных арганізацый вязняў.
Толькі ў 1971 годзе канчаткова выйшаў на волю.
Канец свайго жыцця ён прысвяціў збору матэрыялаў пра ўкраінскі рух на Берасцейшчыне. Уладзімер Леанюк — аўтар унікальнага 2-х томнага «Слоўніка Берасцейшчыны», у якім сабраны звесткі пра ўсё, што лучыць гэты край з Украінай.
У мінулым годзе выйшаў зборнік апавяданняў «Захмараныя досвіткі» — шчымлівыя аповеды пра жыццё ў лагерах, пра моц духу адных і слабасць іншых…
Апошнія дні ён уважліва сачыў за падзеямі на Майдане, моцна перажываў, і сэрца не вытрымала. Ён цвёрда верыў у лепшую будучыню і да апошніх дзён працаваў…
Спіце спакойна, Уладзімір Ігнатавіч! Вечная Вам памяць!
Цяпер чытаюць
Пяць прычын — у тым ліку адна фантастычная, — па якіх беларусам адключылі святло ў гарадах10
Пяць прычын — у тым ліку адна фантастычная, — па якіх беларусам адключылі святло ў гарадах
Агентка Кардаш выкарыстоўвала сэкс, каб збіраць інфармацыю пра каліноўцаў і завербаваць украінскага камандзіра. А куратару КДБ пісала пра яго: «Мой лох»3535
Каментары