Скандал у беларускім футболе, Капскі патрабуе правесці расследаванне
Старшыня праўлення ФК БАТЭ звярнуўся да заўзятараў клуба і футбольнай грамадскасці.
Так Анатоль Капскі зрэагаваў на скандальнае інтэрв'ю галкіпера салігорскага «Шахцёра» Юрыя Цыгалкі сайту goals.by. У ім футбаліст, між іншым, згадаў заканчэнне чэмпіянату Беларусі ў 2006 годзе. У апошнім туры сустракаліся брэсцкае і мінскае «Дынама».
«БАТЭ трэ' было, каб мінскае «Дынама» страціла пункты, — цытуе словы тагачаснага брамніка брэсцкага «Дынама» Юрыя Цыгалкі goals.by. — Перад матчам прыехалі людзі з Барысава. Прастымуляваць. Можа, барысаўцы не верылі, быццам мы зможам адабраць ачкі ў мінчан, бо суму не сталі называць. Сказалі проста: «Хлопцы, мы вас не пакрыўдзім. Аддзячым». Матч завяршыўся з лікам 0:0. БАТЭ стаў чэмпіёнам. Пасля гульні нам перадалі абяцаныя грошы. Хлопцы іх падзялілі. Атрымалася нешта каля двухсот даляраў на чалавека».
Анатоль Капскі называе інтэрв'ю Цыгалкі «непрыемнай падзеяй» у лёсе ФК БАТЭ і яго асабіста. «На адрас нашага клуба былі выстаўлены самыя сур'ёзныя абвінавачванні», — заяўляе Капскі. Ён заклікае адпаведныя органы Беларускай федэрацыі футбола правесці расследаванне, якое «пацвердзіць або аспрэчыць сапраўднасць асобных выказванняў Юрыя Цыгалкі».
Са словаў старшыні ФК БАТЭ, «па рэпутацыі клуба нанесены сур'ёзны ўдар». І калі будзе даказана, што «стымуляванне» сапраўды было, людзей, якія мелі да яго дачыненне, «варта адлучыць ад футбола».
Каментары