Пяць фактаў пра плэйбоя Антона Кушніра: паўгода ад безграшоўя да перамогі на Алімпіядзе ФОТЫ, ВІДЭА
Гісторыі з жыцця фрыстайліста-чэмпіёна.
фота TUT.by
29-гадовы фрыстайліст Антон Кушнір здабыў для Беларусі пяты залаты медаль на Алімпіядзе ў Сочы. «Наша Ніва» ўзгадвае пяць цікавых гісторый з ягонай насычанай біяграфіі.
фота Аляксандра Семянякі, НАК Беларусі
Украінец
Антон нарадзіўся ва ўкраінскім Роўне, як, дарэчы, і іншая беларуская алімпійская чэмпіёнка Алла Цупер. Вось такі ўдалы горад для нашага спорту!
У 2002-м васямнаццацігадовы хлопец пераехаў у Беларусь, бо ўмовы падрыхтоўкі фрыстайлістаў у нашай краіне непараўнальна лепшыя.
У Мінск перспектыўны Антон – на той момант пяціразовы чэмпіён Украіны! – ехаў са сваім трэнерам Галінай Досавай.
Тая рассварылася з кіраўніцтвам Міністэрства спорту Украіны. Трэнер праз некалькі гадоў усё ж вярнулася ва Украіну і ўзначаліла мясцовую зборную, а вось яе выхаванец працягнуў кар’еру ў Беларусі.
Дарэчы, на радзіме, у Роўне, у Кушніра засталіся бацькі.
Правал у Ванкуверы…
Патрохі Кушнір забраніраваў сабе месца ў зборнай Беларусі, а з цягам часу стаў яе лідарам.
На Алімпіяду-2010 Антон ехаў безумоўным фаварытам. Хто, калі не ён, тады быў варты залатога медаля? У тым сезоне Кушнір набраў фантастычную форму. З шасці этапаў Кубка свету ён перамог на чатырох, а на астатніх двух узяў срэбра і бронзу адпаведна.
Кваліфікацыю ён пачаў на належным узроўні: першае месца пасля першага скоку.
Але ў наступны момант здарылася асабістая трагедыя Кушніра. У другім скачку ў яго адшпілілася лыжа…
Прызямліцца роўна ён, вядома ж, не здолеў. З такім вынікам Кушнір не здолеў нават прабіцца ў фінальныя спаборніцтвы. Пераможную эстафету ў яго тады падхапіў іншы беларус, Аляксей Грышын.
…і трыумф у Сочы
На наступнай Алімпіядзе ад Кушніра зноў чакалі медаль, але ўжо не так катэгарычна. Заўзятары спадзяваліся, што ўзнагароду атрымае хоць нехта з беларускіх фрыстайлістаў.
За чатыры гады фармат правядзення спаборніцтваў крыху змяніўся. Цяпер фрыстайлістам даводзіцца захоўваць максімальную канцэнтрацыю на працягу кваліфікацыі (аднаго альбо двух раўндаў) і ажно трох фіналаў.
Пачаў Кушнір упэўнена, але не бліскуча: 7-е месца пасля першага скачку. А значыцца, першая шасцёрка адразу праходзіць у фінал, а Антону і астатнім фрыстайлістам трэба рабіць яшчэ адну спробу.
На гэтым этапе Кушнір парадаваў заўзятараў. Мяккае прызямленне, другое месца ў дадатковай кваліфікацыі, што азначае працяг барацьбы за медалі. А вось Аляксей Грышын спаборніцтвы завяршыў.
Першы фінал – трэба адкінуць чатырох фрыстайлістаў з 12 удзельнікаў. Вылятае яшчэ адзін беларус, Дзяніс Осіпаў, затое Кушнір дэманструе найвышэйшы клас, дзеліць другое-трэцяе месца з украінскім спартсменам. Наперадзе толькі бліскучы кітаец Зоньянь Цзя.
Другі фінал – і трэба адкінуць яшчэ чацвярых.
Суддзі ставяць ацэнкі даволі справядліва, аднак асабістыя перавагі навідавоку. Што ні скачок беларуса, то найлепшы бал ад суддзі з ЗША, і найгоршы – ад Чэхіі.
На гэтым этапе выбывае Дзмітрый Дашчынскі. А ў Кушніра трэцяе месца. Горш за кітайцаў, але лепш за ўсіх астатніх.
Нарэшце, суперфінал. Ранейшыя дасягненні не бяруцца ў разлік. Кушнір заявіў мегацяжкую спробу з максімальным каэфіцыентам 5,0. І выканаў трайное сальта з пяццю вінтамі бліскуча. Пасквапілася на высокую ацэнку толькі чэшка.
Двое кітайцаў, якія стартавалі ўслед за ім, паваліліся адзін за адным, а той самы Зоньянь Цзя нават прызямліўся на галаву.
Перамога Кушніра была бясспрэчнай. Антон – алімпійскі чэмпіён!
Грашовае пытанне
$150 тысяч, які Кушнір атрымае за перамогу ў Сочы, выправяць ягоны фінансавы стан. Як сцвярджаў летась сам спартсмен, грошай яму не хапала.
Базавы заробак «спартсмена-інструктара» дробны, тады ён складаў 2 мільёны рублёў. За такія грошы пражыць складана.
Аднак за папярэднія поспехі Кушнір меў прэзідэнцкую стыпендыю, якая дасягала $3 тысяч. Апроч таго, якія-ніякія даплаты ішлі і ад памежнага камітэта, які традыцыйна падтрымлівае фрыстайлістаў.
Кушнір набыў двухузроўневую кватэру з выхадам на дах у шматпавярховіку ў раёне вуліцы Варанянскага і зажыў прыгожым жыццём.
Аднак правілы дапамогі спартсменам змяніліся. Прэзідэнцкая стыпендыя зменшылася, а з цягам часу пагражала знікнуць канчаткова.
Дый «памежная» дапамога раптоўна скончылася. Як кажа сухая юрыдычная мова, «за здзяйсненне ўчынку, які ганьбіць гонар і годнасць памежніка».
Тады Кушнір і даў сумнае інтэрв’ю «Камсамолцы», у якім скардзіўся: выжываю ад зарплаты да зарплаты. Прэзідэнцкую стыпендыю, дарэчы, яму ўсё ж пакінулі.
Плэйбой
Гісторыя кахання Кушніра – яшчэ адзін займальны сюжэт. Малады перспектыўны спартсмен падабаўся дзяўчатам.
Раман закруціўся з Наталляй Швец – легкаатлеткай, якая захаплялася тайскім боксам. Дарэчы, беларуска нават перамагала на конкурсе прыгажосці ў Польшчы!
Рамантычныя адносіны пратрымаліся год, хлопец з дзяўчынай вырашылі «застацца сябрамі».
А Кушнір захапіўся спявачкай гурта «Топлес» Таццянай Банькоўскай. З дзяўчынай ён пазнаёміўся падчас фотасесіі для «Прэсбола». І гэты раман працягнуўся каля года.
А пасля фрыстайліст паехаў адведаць сваіх бацькоў разам і з Таццянай, і… з Наталляй, тагачасны бойфрэнд якой не змог выправіцца ў падарожжа.
…Карацей, усё скончылася шлюбам Антона з Наталляй. Цяпер маладыя гадуюць сына Платона, неўзабаве хлопчыку будзе два гады.
Што да грамадзянскай пазіцыі Кушніра, то ў інтэрв'ю »Прэсболу» ён вырашыў шматзначна адмаўчацца: «Я альбо ўвогуле не буду гаварыць, альбо скажу ўсё як ёсць».
На пратэстанцкі фестываль у «Чыжоўку-Арэну» едзе амерыканскі прапаведнік Франклін Грэм. Разам з ім чакаюць Коўла з жонкай14
Каментары