На сусветнай выставе «Экспа-2015» пакажам не інавацыі, а саламяныя качулкі.
Сусветная выстава распачнецца 1 мая 2015 у Італіі, пад Міланам. Тут, на плошчы ў 1,7 мільёна м2 разгорнуцца экспазіцыі розных краін на тэму «Накарміць планету. Энергія для жыцця».
Каб спраектаваць павільён, Беларусь арганізавала нацыянальны архітэктурны конкурс. Праект пераможцаў (Ігара Казюлькова, Дзмітрыя Беляковіча і Аляксандра Шыпілава) называецца «Кола жыцця». На яго будаўніцтва, абслугоўванне і дэмантаж выдаткуюць 6 мільёнаў еўра.
Ідэя «Кола жыцця» — у дэманстрацыі трох асноўных багаццяў Беларусі: хлеба, солі і вады.
У цэнтры экспазіцыі будзе 13метровае драўлянае кола млына, якое «сімвалізуе рух і чалавечую думку». Побач з ім — саламяныя качулкі, якія будуць сімвалізаваць палі з толькі што прыбраным хлебам. Падчас семінараў і лекцый наведнікам раскажуць пра «беларускі досвед устойлівага развіцця сельскай гаспадаркі, вытворчасці карысных і высакаякасных прадуктаў харчавання», гэта значыць пра калгасы і аграгарадкі, а таксама… пра барацьбу з лішняй вагой. Сцены і столь пляцоўкі будуць дэкараваныя соллю.
Будзе кавярня з нацыянальнымі стравамі, сувенірная крама (лён, салома і дрэва), пляцоўка для выступу народных калектываў.
Яны пакажуць традыцыйныя святы (Масленіцу, Вялікдзень, Купалле, Дажынкі). Прэзентацыя народных песняў і танцаў пазіцыянуецца як «візітная картка беларускага павільёна».
Каментары