Новая палітычная сітуацыя: як беларускаму грамадству дзейнічаць ва ўмовах, калі Пуцін гатовы ўводзіць войскі ў адказ на перамены?
Піша Ігар Маханёк.
Пуцін напаў на Украіну адразу пасля змены ўлады. Вы ўяўляеце, што будзе з Беларуссю, калі ўлада зменіцца?
Раней мы заўсёды змагаліся за перамогу дэмакратычных празаходніх кандыдатаў і за бел-чырвона-белы сцяг, ведаючы, што краіне неабходна вызваляцца ад прыгнёту лукашызму. Але тут з'яўляецца знешні фактар.
Калі ў Беларусі Лукашэнка перастане быць прэзідэнтам, то Пуцін увядзе свае войскі практычна адразу. І што будзе з краінай? У адрозненне ад Украіны, у Беларусі няма легітымнага парламента, які будзе змагацца за незалежнасць. У Беларусі няма сваёй арміі — старшыя афіцэры ВС РБ прысягалі яшчэ СССР і асабіста Лукашэнку, але на Беларусь ім пляваць. У Беларусі расейскія ваенныя базы. Памежнага кантролю няма, і ўвайсці могуць лёгка як сотні тысяч правакатараў, так і танкі.
У Беларусі няма такіх моцных свабодалюбных рэгіёнаў, як Львоўшчына ва Украіне. Пераязджаць з акупаваных тэрыторый не будзе куды. З пашпартамі Беларусі мы ўсе будзем як герой Тома Хэнкса ў тэрмінале.
І на фоне ўсяго гэтага — з Лукашэнкам у нас пакуль незалежнасць. І нават калі Пуцін нападзе на краіну да змены ўлады, тут папулярнасць Лукашэнкі будзе важным дадатковым фактарам. І калі нейкі малойчык з Растова павесіць бела-сіне-чырвоны сцяг на выканкам, яго арыштуюць тыя самыя мянты, якія арыштоўваюць за бел-чырвона-белы.
Чырвона-зялёны сцяг — не мой сцяг, але лепш ён над будынкамі Мінска, а не сцяг суседняй дзяржавы. І калі пачнецца вайна, то наша армія абараняць краіну будзе менавіта пад чырвона-зялёнымі сцягамі. І пры такім — не дай Бог — развіцці падзей нам прыйдзецца пад гэтым сцягам аб'яднацца, якім бы саўковым і жахлівым ён ні быў.
Бел-чырвона-белая незалежнасць, на жаль, ізноў стане магчымая толькі тады, калі пуцінскі рэжым спыніць існаванне.
Мы ўпусцілі свой шанец у 90-х, калі Расія не нападала на суседзяў. Тады палякі, чэхі, латышы, літоўцы і эстонцы паспелі. Цяпер доўга чакаць новага шанцу.
* * *
Ігар Маханёк (нар. 1984) — выбітны беларускі праграміст. Працуе ў карпарацыі Google у Нью-Ёрку.
Каментары