Індыю па-ранейшаму не цікавіць купля долі ў «Беларуськаліі», заявіў пасол гэтай краіны ў Беларусі Манодж Кумар Бхарці на прэс-канферэнцыі ў Мінску 13 жніўня.
«Што да куплі долі ў «Беларуськаліі», я ўжо казаў, што Індыя не выказвае цікавасці да яе. Але супрацоўніцтва ў сферы калійных угнаенняў будзе працягвацца як і раней», — заявіў дыпламат.
Пасол падкрэсліў, што не ведае, па якіх цэнах пастаўляецца беларускі калій у Індыю, і бакі захаваюць сённяшні парадак штогадовага перазаключэння кантрактаў на пастаўку ўгнаенняў.
Роўна год таму, 13 жніўня 2013 года, Бхарці заяўляў, што ў індыйскага боку захоўваецца цікавасць да беларускага вытворцы калійных угнаенняў.
«Індыя — вялікая краіна з вялікім насельніцтвам, якая вельмі залежыць ад сельскай гаспадаркі. Таму значнасць калію для індыйскага боку будзе захоўвацца. Індыя была зацікаўленая ў «Беларуськаліі» раней, зацікаўленая цяпер і будзе зацікаўленая ў будучыні», — адзначыў тады пасол.
Аднак ужо 22 студзеня 2014 года пазіцыя Індыі, паводле яго слоў, змянілася. «Цяпер гэтае пытанне набыло некалькі іншую дынаміку. Мы разглядаем гэтае пытанне так, што ўрад Беларусі ніколі не думаў прадаваць частку акцый «Беларуськалія» індыйскаму боку. Таму зараз мы пра гэтае пытанне не думаем», — заявіў тады Бхарці.
Цяпер чытаюць
Трагедыя з 30‑гадовай доктаркай са Старобіна — пайшла выдаляць зуб мудрасці і памерла2
Каментары