Кампанія i-Store, якая з’яўляецца афіцыйна прызнаным дыстрыб’ютарам тэхнікі Apple, 29 кастрычніка заявіла на TUT.BY аб старце беларускіх продажаў iPhone 6. На наступны дзень старонка смартфона знікла з сайта кампаніі, падзею i-Store не пракаментаваў. Дзе яшчэ можна купіць iPhone 6 і колькі ён будзе каштаваць?
Афіцыйна кампанія Apple не прадае ў Беларусі смартфоны iPhone. Кампанія i-Store, аўтарызаваная Apple як «Premium Reseller», прадавала і прадае планшэты iPad ці плэеры iPod, але шукаць «айфоны» беларусам дагэтуль трэба ў іншых месцах.
Кампаніі, якія не з’яўляюцца «Premium Reseller» тэхнікі Apple, могуць легальна прадаваць iPhone, але іх апараты «здабываюцца» з-за мяжы і не прызначаныя для беларускага рынку. Такія прадаўцы могуць даваць гарантыю, а гарантыйныя майстэрні адрамантуюць пагнуты смартфон, але такі рамонт можа быць меней якасным, болей доўгім і дарагім — ці наогул не адбыцца. Як пашанцуе. Тым не меней, беларусы актыўна купляюць iPhone і наўрад ці адмовяцца ад спакусы «шасцёркай».
Купіць «неафіцыйныя» iPhone 6 можна ў шматлікіх беларускіх інтэрнэт-крамах, у тым ліку на «агрэгатарах цэнаў» кшталту KUPI.TUT.BY, Catalog.Onliner.by ці Migom.by. Сярэднія цэны на пляцоўках адрозніваюцца нязначна, але ў асобных крамах могуць быць вышэй ці ніжэй за сярэднюю. Прадаўцы не паведамляюць у апісанні аб надбаўцы за «модны» залаты колер корпусу апарата, але нярэдка залацістыя iPhone каштуюць даражэй за шэрыя.
Мінімальная цана «маленькага» iPhone 6 з 16 Гб памяці складае ад 9 млн рублёў альбо прыкладна $840 — 1,4 сярэдней зарплаты беларуса ў верасні. «Вялікі» iPhone 6 Plus з мінімальнымі 16 Гб памяці ацэньваюць мінімум у 11,2 млн альбо $1050. Самы дарагі iPhone 6 Plus з 128 Гб памяці каштуе ад 13,8 млн альбо $1290, больш за дзве сярэдніх зарплаты беларуса.
Для параўнання. У расійскім Смаленску за iPhone 6 просяць ад 32 тысяч расійскіх рублёў — $750. Цягнік з Оршы да Смаленска каштуе каля $20-25. Столькі ж каштуе iPhone 6 на расійскай версіі афіцыйнага сайта Apple. У Луцку, што на ўкраінскай Валыні, iPhone 6 можна знайсці за 11 тысяч грывень — $850. Самая нізкая цана на iPhone 6 у Вільні — 2300 літаў, альбо каля $850. Яшчэ болей за iPhone папросяць у польскім Беластоку — 2900 злотых альбо каля $875. У ЗША iPhone 6 без кантракта з аператарам каштуе $649.
На інтэрнэт-пляцоўках накшталт Ebay iPhone 6 з дастаўкай у Беларусь прадаецца ў сярэднем ад $700. Але ў такім разе ёсць небяспека атрымаць няякасны тавар ці падробку. Вяртаць тавар на Ebay можна цягам 14 дзён, грошы гарантуюць вярнуць, але пра няўдалыя пакупкі на Ebay распавядаюць розныя гісторыі.
Будзьце пільнымі, калі бачыце падазрона нізкую цану! Нядаўна ў Расіі было выкрытае махлярства на мільёны даляраў: фірма прапаноўвала iPhone 6 за 20 тысяч расійскіх рублёў ($470), але пакупнікі, якія ўнеслі грошы папяэдне, не атрымалі смартфоны і не змаглі вярнуць грошы.
iPhone 6 і iPhone 6 Plus былі прадстаўленыя Apple 9 верасня. Па такіх характарыстыках, як памеры экранаў, час аўтаномнай работы і характарыстыкі камер, яны дагналі канкурэнтаў на Android. Продажы чарговай версіі «айфона» традыцыйна пабілі рэкорд папярэднікаў. Але пакупнікі iPhone 6 наракаюць на нечаканую праблему: смартфоны псуюцца пры штодзённым карыстанні, яны могуць пагнуцца проста ад нашэння ў кішэні.
Цяпер чытаюць
Палітвязняў па ўсёй краіне апытваюць: пасля памілавання вы хочаце застацца ў Беларусі ці з'язджаць?4
Палітвязняў па ўсёй краіне апытваюць: пасля памілавання вы хочаце застацца ў Беларусі ці з'язджаць?
Агентка Кардаш выкарыстоўвала сэкс, каб збіраць інфармацыю пра каліноўцаў і завербаваць украінскага камандзіра. А куратару КДБ пісала пра яго: «Мой лох»3535
Каментары