У органы ўнутраных спраў Беларусі зноў паступілі звароты ад грамадзян, якія сталі ахвярамі хакераў, што вымагаюць грошы пад выглядам штрафаў ад МУС Беларусі, паведамілі ў беларускім міліцэйскім ведамстве.
«У заражаных камп'ютарах блакуецца браўзер, а на экране манітора з'яўляецца патрабаванне аплаціць штраф у памеры Br1 млн. Толькі за апошнія дзесяць дзён на прапанаваны злачынцамі электронны кашалёк пераведзена парадку Br40 млн», — распавялі ў МУС.
У ведамстве патлумачылі, што хакеры, выдаючы сябе за прадстаўнікоў МУС, прапануюць выплаціць штраф за прагляд і капіраванне матэрыялаў, якія змяшчаюць элементы педафіліі, гвалту і гей-порна. Далей прыводзіцца інфармацыя аб тым, што на працягу сутак пасля выплаты штрафу «парушальнік» атрымае код разблакоўкі свайго браўзера.
«МУС Рэспублікі Беларусь звяртае ўвагу, што падобныя пасланні — справа рук аферыстаў, і паддавацца на правакацыі аб выплаце так званага штрафу не варта. Для сыходу з блакаванай вэб-старонкі трэба скарыстацца «дыспетчарам задач», набраць камбінацыю Ctr +Alt+Deletе, пасля чаго закрыць праграму браўзера», — сказалі ў міністэрстве.
Калі грошы злачынцам ужо пераведзеныя, варта звярнуцца з заявай у тэрытарыяльныя органы ўнутраных спраў. Для хакераў за такія ашуканскія дзеянні прадугледжана пакаранне аж да дзесяці гадоў пазбаўлення волі з канфіскацыяй маёмасці па арт.209 КК. Акрамя таго, за распрацоўку, выкарыстанне або распаўсюджванне шкоднасных праграм ім пагражае да двух гадоў пазбаўлення волі па ст.354 КК.
У МУС нагадалі, што выпадкі распаўсюджвання падобных шкоднасных праграм з аналагічнымі формамі незаконнага завалодання грашыма фіксаваліся і раней. Тады ўсё зламыснікі былі выяўленыя і затрыманыя. Да прыкладу, у 2012 годзе супрацоўнікі міліцыі затрымалі магістра тэхнічных навук, які распаўсюджваў шкоднаснае праграмнае забеспячэнне Winlock. На працягу некалькіх месяцаў яму ўдалося зарабіць некалькі дзесяткаў мільёнаў беларускіх рублёў за кошт даверлівых інтэрнэт-карыстальнікаў. У цяперашні час ён асуджаны і адбывае пакаранне.
Цяпер чытаюць
У рэстаране «Мак.бай» на загад Лукашэнкі перайменавалі амерыкана. Як назвалі?22
Каментары