Мінпрацы анансавала пашырэнне лічбавых сэрвісаў замест процьмы папер
Міністэрства працы і сацыяльнай абароны плануе істотна пашырыць лічбавыя сэрвісы, звязаныя з рознымі жыццёвымі сітуацыямі грамадзян, каб зрабіць працэдуры прасцейшымі, хутчэйшымі і менш залежнымі ад папяровай дакументацыі, паведаміла намесніца міністра Юлія Берднікава.
Напрыклад, плануецца, што пры нараджэнні дзіцяці чалавек зможа ў межах аднаго лічбавага працэсу адразу зрабіць некалькі важных дзеянняў: зарэгістраваць дзіця ў ЗАГСе, аформіць яго па месцы жыхарства ды ініцыяваць прызначэнне розных выплат і дапамог, звязаных з нараджэннем і выхаваннем дзіцяці. Гэта значна скароціць колькасць паездак у розныя ўстановы і ашчадзіць час.
Аналагічна плануецца лічбавізаваць працэдуры, звязаныя са смерцю чалавека. Зараз гэта патрабуе збору розных папер і асабістых зваротаў у дзяржаўныя органы, але ў будучыні гэта будзе адбывацца праз электронныя сэрвісы: атрыманне даведкі аб смерці ў электронным выглядзе, рэгістрацыя ў ЗАГСе і аўтаматычны запуск працэдуры прызначэння дапамогі на пахаванне.
Асобна адзначаецца ўкараненне электроннага лістка непрацаздольнасці. Гэта значыць, што замест традыцыйнага папяровага «бальнічнага» работнікам не трэба будзе перадаваць папяровыя дакументы працадаўцу — уся інфармацыя будзе афармляцца і перадавацца ў электронным выглядзе. Плануецца таксама правесці тэставанне сістэмы для выплат па цяжарнасці і родах, а пасля паспяховай праверкі распаўсюдзіць яе і на іншыя віды часовай непрацаздольнасці.
Акрамя таго, ужо цяпер у краіне развіваецца аўтаматычнае прызначэнне некаторых выплат, напрыклад пенсіі па інваліднасці. У такім выпадку, калі інфармацыйныя сістэмы фіксуюць адпаведную жыццёвую падзею, выплата прызначаецца без неабходнасці дадатковых зваротаў з боку чалавека.
Каментары