Указам прэзідэнта № 607 ад 20 снежня 2014 года «Аб падатку на біржавыя аперацыі па набыцці замежнай валюты» Аляксандр Лукашэнка ўзаконіў 30-працэнтны збор пры куплі валюты на Беларускай валютна-фондавай біржы. Збор будзе брацца да 1 лютага 2015 года.
Згодна з дакументам, апублікаваным прэс-службай прэзідэнта, плацельшчыкамі падатку прызнаюцца банкі, якія набываюць замежную валюту на БВФБ. Падатковай базай падатку прызнаецца сума грашовых сродкаў у беларускіх рублях, выплачаная за набытую замежную валюту.
Сума падатку «кампенсуецца плацельшчыкам арганізацыямі і індывідуальнымі прадпрымальнікамі, на карысць якіх ажыццяўляецца набыццё замежнай валюты на таргах».
Падатак «не ўключаецца ў затраты па вытворчасці і рэалізацыі тавараў (работ, паслуг), маёмасных правоў, што ўлічваюцца пры падаткаабкладанні, а таксама ў склад пазарэалізацыйных расходаў».
Банкі пералічваюць замежную валюту арганізацыям і індывідуальным прадпрымальнікам пры ўмове кампенсацыі імі сумы падатку ў поўным аб'ёме, забяспечваюць унясенне сум падатку ў рэспубліканскі бюджэт не пазней за трэці працоўны дзень, што ідзе за днём правядзення таргоў, ажыццяўляюць кантроль за правільнасцю вылічэння падатку.
Вызваляецца ад падатку набыццё замежнай валюты на біржавых таргах за кошт бюджэтных сродкаў і «для разлікаў за тавары згодна з дадаткам» (у ім — нафта, газ і электраэнергія).
Урад упаўнаважаны «ў выпадку змянення сітуацыі на валютным рынку Рэспублікі Беларусь па ўзгадненні з Нацыянальным банкам устанаўліваць іншы памер стаўкі падатку».
Указ набыў моц з дня падпісання.
Цяпер чытаюць
Эйсмант: Статкевіча памілавалі ўжо паўгода назад, але тады ён вярнуўся ў турму14
Каментары