На вуліцах горада Канкорд у штаце Каліфорнія, ЗША, заўважылі аўтамабіль з незвычайнай прыладай на даху, распавядае CBS.
Аўтамабіль Dodge Caravan быў (паводле звестак CBS) арэндаваны кампаніяй Apple. Прылада на яго даху можа выкарыстоўвацца і для стварэння вулічных панарам як на Google Street View. Але прылада больш нагадвае тую, што заўважылі на самакіраваным «Доджы» ў верасні 2014 года ў Нью-Ёрку.
Apple не можа самастойна тэставаць беспілотныя аўтамабілі — кампанія не ўваходзіць у лік 6 кампаній, што маюць на тое дазвол у Каліфорніі. Але Apple магла арэндаваць машыну і заключыць партнёрскае пагадненне з кампаніяй, што мае дазвол.
iPhone 6 прынес Apple рэкордны прыбытак. Але ён можа выйсці з моды, як цяпер выйшаў з моды плэер iPod.
За рынкам беспілотных аўто можа быць будучыня — чаму бы Apple сябе на тым рынку не паспрабаваць?
Беспілотныя аўтамабілі распрацоўвае кампанія Google, не так даўно яна прадставіла поўнафункцыянальны прататып. Лабараторыю беспілотных аўто 2 лютага займеў такса-сэрвіс Uber. Аб планах па стварэнні беспілотных грузавікоў заявіў расійскі «Камаз».
Каментары