Гомельскі Red Pub праводзіць вечарыну «Рускі дух»
У рэдакцыю «НН» звярнуўся чытач з Гомеля Яўген, які заўважыў, што мясцовы Red Pub 3 красавіка праводзіць вечарыну «Рускі дух». І гэта зусім не першакрасавіцкі жарт.
«Мы робім калектыўны хоп-хэй-лала-лэй на самай душэўнай і роднай дыскатэцы «Рускі дух», — пішацца на старонцы вечарыны ў «Укантакце». —
Лекавая вадчэлла ў дуэце з гурочкам салёным дадасць усім сілаў і энергіі! Усё будзе па старой традыцыі: дзеўкі — гарачыя, мужыкі — шчодрыя, песні ўсім вядомыя».
Пішацца, што ў некаторых гасцей вечарыны будзе магчымасць выпіць бясплатнай гарэлкі.
Высвятляецца, што такія вечарыны ў Гомелі праходзяць ужо не ўпершыню. Папярэдняя прайшла 20 сакавіка. Моладзь фоткалася з шыльдачкай «Рускі дух», а таксама з вялікай матрошкай. Ды-джэі былі ў рускіх нацыянальных строях.
«НН» патэлефанавала арт-дырэктару Red Pub Ніне Серабровай, каб даведацца ў чым сэнс гэтых мерапрыемстваў? Найперш спадарыня Ніна папрасіла размаўляць па-руску, бо яна сама з Расіі і кепска разумее беларускую.
«Так, сапраўды, мы не ўпершыню праводзім такія вечарынкі. Ёсць арганізатары, якія здымаюць у нас памяшканне».
На каго накіраваная вечарына «Рускі дух»: на беларусаў ці расіян? «Мы так глыбока не капаем, — кажа арт-дырэктар установы. – Людзі проста прыходзяць адпачываць, добра бавіць час».
Далей размаўляць спн.Ніна адмовілася. «Сябры, мы ўжо хутка сальемся ў душэўным танцы «Рускага духу», — прадчувае старонка Red Pub «Укантакце».
Нагадаем, што ў лістападзе летась мінскі клуб Dozari праводзіў вечарыну «Рускім быць модна», але ў выніку паднятай у прэсе шуміхі арганізатары былі вымушаныя правесці вечарыну «Грандыёзнае нацыянальнае шоу».
Цяпер чытаюць
Ціханоўская і Зяленскі ўпершыню правялі сустрэчу. Зяленскі запрасіў Святлану ў Кіеў8
Каментары