Супрацоўнікі аддзялення наркакантролю Ленінскага РАУС Брэста затрымалі двух вулічных музыкаў па падазрэнні ў збыце псіхатропных рэчываў, паведамілі карэспандэнту БЕЛТА ў аддзяленні інфармацыі і грамадскіх сувязей УУС Брэсцкага аблвыканкама.
У злачынным бізнэсе абвінавачаныя жыхары Брэста 1989 і 1991 гадоў нараджэння.
З лютага бягучага года пара музыкаў рэгулярна выступала на пешаходнай вуліцы Савецкай — упадабаным месцы адпачынку берасцейскай моладзі. Аднак дуэт аказаўся крымінальны.
Аператыўнае назіранне паказала, што скрыпач і гітарыст не толькі самі ўжывалі псіхатропы, але і збывалі іх. Прычым адзін з музыкаў раней трапляў у лячэбную ўстанову з-за перадозу наркотыкаў.
«Схема куплі-продажу была простая, — растлумачыў намеснік начальніка ўпраўлення наркакантролю і процідзеяння гандлю людзьмі Уладзімір Жыгар. — Грошы замоўцы кідалі ў капялюш пад выглядам платы за мастацтва. У сярэднім цана дозы спайсаў складала Br250 тыс. Музыкі звярталі ўвагу на памер купюр. Калі яны былі значныя, тут жа на месцы тавар узважвалі і аддавалі».
Музыкі былі затрыманыя 5 жніўня. Пры асабістым вобшуку ў іх канфіскаваныя псіхатропныя рэчывы і электронныя вагі.
На аднаго з фігурантаў распачата крымінальная справа па ч.3 арт.328 (незаконны абарот наркатычных сродкаў, псіхатропных рэчываў, іх прэкурсораў і аналагаў). Маладому чалавеку пагражае да 15 гадоў пазбаўлення волі.
У дачыненні да другога праводзіцца праверка на прадмет яго дачынення да збыту псіхатропаў.
У цэлым па Брэсцкай вобласці за шэсць месяцаў 2015 выяўлена 568 злачынстваў па лініі наркакантролю (на 81 злачынства больш, чым за аналагічны перыяд 2014), з якіх 222 звязаны са збытам.
Канфіскавана больш за 16 кг наркатычных сродкаў і псіхатропных рэчываў.
Сёлета ў бальніцы вобласці з перадазіроўкай наркотыкаў дастаўлены 57 чалавек, з іх больш за 40 пацярпелі ад спайсаў.
Цяпер чытаюць
Тамара Віннікава прадала свой лонданскі дом, завешаны карцінамі самой сябе ШМАТ ФОТА20
Каментары