Пасол Расіі ў Варшаве выклікаў абурэнне палякаў, заявіўшы, што Польшча часткова вінаватая ў пачатку Другой сусветнай вайны.
У інтэрв'ю, якое транслявалася тэлекампаніяй TVN24 у пятніцу ўвечары, пасол Сяргей Андрэеў заявіў, што палітыка польскіх уладаў прывяла да катастрофы ў верасні 1939 года, бо на працягу 1930-х гадоў Польшча неаднаразова блакавала стварэнне антыгітлераўскай кааліцыі.
Таму, паводле яго слоў, Польшча часткова вінаватая ў сувязі з трагедыяй.
Як паведамляецца, расійскі пасол будзе выкліканы ў панядзелак у МЗС Польшчы для тлумачэнняў.
Сяргей Андрэеў заявіў таксама, што ў 1939 годзе Савецкі Саюз дзейнічаў у мэтах самаабароны, таму ўварванне СССР у Польшчу не можа лічыцца агрэсіяй.
У інтэрв'ю польскаму тэлебачанню Андрэеў таксама паскардзіўся на тое, што польска-расійскія адносіны цяпер горшыя, чым калі-небудзь за папярэднія 70 гадоў, бо Варшава выбрала замарозку палітычных і культурных кантактаў краін.
Польскі МЗС у суботу выказаў свае «здзіўленне і трывогу» словамі расійскага дыпламата, заявіўшы, што пасол «падрывае гістарычную праўду» і, «відаць, спрабуе апраўдаць злачынствы сталінізму».
«Кропка гледжання, прадстаўленая самым высокім прадстаўніком расійскай дзяржавы ў Польшчы, падрывае гістарычную праўду і адлюстроўвае самую крывадушную інтэрпрэтацыю падзей, вядомых яшчэ з часоў сталінізму і камунізму», — гаворыцца ў заяве міністэрства замежных спраў Польшчы.
«Мы расцэньваем гэта як непавагу да памяці ахвяраў злачынстваў НКВД, учыненых па загадзе савецкіх уладаў», - заявіў польскі МЗС.
Пасля ўварвання савецкай арміі ў Польшчу больш за 200 тысяч польскіх вайскоўцаў былі адпраўленыя ў ГУЛАГ, больш за 20 тысяч былі расстраляныя ўвесну 1940 года супрацоўнікамі НКВД у Катыні.
Прэм'ер-міністр Польшчы Эва Копач таксама выказала сваё незадавальненне заявамі расійскага дыпламата.
«Роля акрэдытаванага ў краіне пасла павінна быць у тым, каб будаваць гарманічныя і дружалюбныя адносіны паміж краінамі», — нагадала кіраўнік польскага кабінета міністраў.
Адказваючы на пытанне пра выказванні расійскага пасла, Эва Копач заўважыла: «Нават дзеці ведаюць, што ні Рыбентроп, ні Молатаў не былі палякамі».
Трагедыя з 30‑гадовай доктаркай са Старобіна — пайшла выдаляць зуб мудрасці і памерла23
Каментары