Па меншай меры шэсць чалавек загінулі ў выніку перастрэлкі паміж паліцыянтамі і членамі рэлігійнай суполкі ў пасёлку Нардаран ў 25 кіламетрах на поўнач ад Баку.
Чацвёра загінулых — мясцовыя жыхары і двое — супрацоўнікі паліцыі, заявілі ў МУС і генеральнай пракуратуры Азербайджана.
Затрыманыя 14 чалавек, якія, па версіі ўладаў, планавалі пераварот. Паведамляецца, што бакі ўжылі стралковую зброю і гранаты.
Як перадае азербайджанскі навінавы сайт Haqqin, мясцовыя жыхары перакрылі подступы да пасёлка. Да Нардарана накіраваныя падраздзяленні ўнутраных войскаў МУС.
Групы вернікаў сабраліся на цэнтральнай плошчы пасёлка і спяваюць жалобныя спевы па загінулых адзінаверцах.
У чацвер сілы правапарадку затрымалі шыіцкага багаслова Талеха Багірзадэ, які ўзначальвае рух «Мусульманскае адзінства», і яшчэ некалькі чалавек.
Інцыдэнт адбыўся падчас дзённага намаза. Насельніцтва пасёлка Нардаран, паводле дадзеных СМІ, адрозніваецца асаблівай рэлігійнасцю і апазіцыйнасцю ў адносінах да свецкіх уладаў Азербайджана.
У сумеснай заяве МУС і генеральнай пракуратуры Азербайджана гаворыцца: «Узброеная радыкальная ісламская група рыхтавала серыю правакацый, тэрактаў і масавых беспарадкаў».
Як сцвярджаюць праваахоўныя органы Азербайджана, Багіраў і яго аднадумцы планавалі «гвалтоўнае змяненне канстытуцыйнага ладу і ўвядзенне ў краіне нормаў шарыяту».
«Мусульманскае адзінства», па версіі МУС і пракуратуры Азербайджана, прыцягвала прыхільнікаў, забяспечвала іх зброяй і прапагандысцкімі матэрыяламі, рыхтавала тэракты супраць дзяржчыноўнікаў.
Багаслоў Багіраў раней падвяргаўся арыштам і адбываў тэрміны нібыта за захоўванне наркотыкаў. Азербайджанскія праваабаронцы прызналі яго палітвязнем.