Зяленскі анансаваў з'яўленне ва Украіны беспілотнікаў з далёкасцю палёту да 10 тысяч кіламетраў
Прэзідэнт Украіны Уладзімір Зяленскі ў інтэрв'ю амерыканскай блогерцы Лоры Лумер заявіў, што найбліжэйшыя гады Украіна істотна павялічыць далёкасць сваіх ударных беспілотнікаў.
Паводле слоў Зяленскага, цяпер Украіна ўжо мае дроны, здольныя пераадольваць больш за 3 тысячы кіламетраў. Да канца гэтага года плануецца стварэнне беспілотнікаў з далёкасцю каля 4 тысяч кіламетраў, а ў наступным годзе — ад 5 да 10 тысяч кіламетраў.
Калі гэтыя планы будуць рэалізаваныя, украінскія беспілотнікі змогуць дасягаць любога пункту на тэрыторыі Расіі, у тым ліку самых аддаленых рэгіёнаў, такіх як Магаданская вобласць, Чукотка, Камчатка і Сахалін.
Зяленскі адзначыў, што праграма развіцця далёкабойных беспілотнікаў пераходзіць на новы этап. Паводле яго, Украіна ўжо перадае Злучаным Штатам свой баявы вопыт выкарыстання марскіх, паветраных і далёкабойных дронаў. Акрамя таго, Кіеў і Вашынгтон плануюць наладзіць супольную вытворчасць беспілотнікаў, у тым ліку пабудаваць завод на тэрыторыі ЗША. Як сцвярджае ўкраінскі прэзідэнт, пагадненне па гэтым праекце амаль падрыхтаванае.
У сакавіку 2025 года Зяленскі ўпершыню афіцыйна паведаміў пра паспяховыя выпрабаванні ўкраінскага беспілотніка з далёкасцю палёту каля 3 тысяч кіламетраў. У ліпені 2026 года адзін з такіх дронаў нанёс удар па Омскім нафтаперапрацоўчым заводзе, які знаходзіцца прыкладна за 2,5 тысячы кіламетраў ад тэрыторыі Украіны.
На саміце НАТА ў Анкары 7 ліпеня Зяленскі заявіў, што выкарыстанне далёкабойных беспілотнікаў пазбавіла Расію перавагі ў выглядзе глыбокага тылу, дзе яна раней магла бяспечна размяшчаць вайсковую вытворчасць, тэхніку і склады. На яго думку, такія ўдары павінны павялічыць кошт вайны для Расіі і наблізіць дасягненне міру.
10 ліпеня прэзідэнт Украіны падпісаў указ аб стварэнні ў складзе Узброеных сіл краіны асобнага камандавання далёкабойнага ўздзеяння. Паводле яго слоў, новая структура павінна аб'яднаць усе адпаведныя рэсурсы для нанясення ўдараў па аб'ектах, якія зніжаюць ваенны патэнцыял Расіі.
Каментары