Прэзідэнт Украіны Пятро Парашэнка пракаментаваў канфлікт міністра ўнутраных спраў Арсена Авакава і кіраўніка Адэскай абласной дзяржаўнай адміністрацыі Міхаіла Саакашвілі, які адбыўся ў панядзелак на пасяджэнні Нацыянальнай рады рэформаў.
«Як Прэзідэнт, гарант Канстытуцыі, правоў і свабод грамадзян, я не магу абысці маўчаннем ганебны інцыдэнт, які адбыўся ў панядзелак на Нацыянальнай радзе рэформаў. Дыскусія на гэтай пляцоўцы часта атрымліваецца вострай і гарачай. Там сутыкаюцца розныя пункты гледжання, прадукуюцца ідэі, знаходзяцца кампрамісы, нараджаюцца рэформы. Але ў Нацрадзе, дзе як нідзе, недапушчальныя грубая лаянка і абразы, — асабліва тыя, якія маюць ксенафобскі падтэкст, закранаюць нацыянальную годнасць чалавека, ставяць пад сумнеў яго ўкраінскі патрыятызм, прапануюць камусьці «забірацца з Украіны», — заявіў Парашэнка.
Прэзідэнт адзначыў, што не шкадуе, што запрасіў ва Украіну міжнародную каманду рэфарматараў. Парашэнка таксама адзначыў, што «хацеў бы, каб ні дзяржаўныя служачыя, ні народныя дэпутаты не бралі ўдзелу ў падобных «спектаклях».
«Пераканаўча будзе выглядаць не той, хто скажа прыгажэй, а хто сваю доказную базу падасць у Нацыянальнае антыкарупцыйнае бюро», — адзначыў кіраўнік украінскай дзяржавы.