«Амкадор» прынёс сенатару Шакуціну мільёны даляраў стратаў
Чыстая страта найбуйнейшага прыватнага машынабудаўнічага холдынгу Беларусі «Амкадор», уладальнікам якога з'яўляецца сенатар Аляксандр Шакуцін, у мінулым годзе вырасла больш чым у два разы.
Пра гэта сведчаць дадзеныя апублікаванай справаздачы аб прыбытках і стратах прадпрыемства ў 2015 годзе.
Выручка ААТ «Амкадор — кіруючая кампанія холдынгу» скарацілася больш чым на 20% (з 1 089 870 млн рублёў да 891 107 млн рублёў), а чыстыя страты выраслі ў 2,28 раза — да 217 369 млн рублёў, ці амаль да 11 млн даляраў.
Уладальнікам кантрольнага пакета холдынгу з канца 2012 года з'яўляецца кампанія «Інтэрсэрвіс». Яе ўласнікамі ў сваю чаргу называюцца адзін з самых уплывовых бізнэсоўцаў Беларусі, член Савета Рэспублікі Нацыянальнага сходу Беларусі і старшыня Беларускай тэніснай федэрацыі Аляксандр Шакуцін і яго наваполацкі партнёр Мікалай Верабей. Таксама з 2002 года ў акцыянеры холдынгу ўваходзяць непальскія інвестары, чые інтарэсы ў наглядальнай радзе прадстаўляе Нірадж Шрэстха. 7,07% акцый ААТ «Амкадор — кіруючая кампанія холдынгу» належаць дзяржаве.
З чыстай стратай мінулы год скончылі і некалькі даччыных прадпрыемстваў, што ўваходзяць у склад холдынгу.
Чыстая страта, паводле справаздач за 2015 год, амаль у тры разы вырасла на ААТ «Амкадор-Белвар» (32 389 млн рублёў). ААТ «Амкадор-Дзяржынск» па выніках 2014 года было прыбытковым, але ў мінулым годзе чыстая страта кампаніі склала 5 361 мільёнаў рублёў. У «чысты» мінус спрацавала і ААТ «Амкадор-Унімод» (5 648 млн рублёў).
Стратныя і некаторыя іншыя прадпрыемствы сенатара. Напрыклад, чыстая страта кампаніі «Салея-Гомель», якая ўваходзіць у кантраляваны бізнэсменам холдынг «Салея», склаў па выніках 2015 года 33 346 млн рублёў.
Як пісалі беларускія СМІ, у сакавіку на прадпрыемстве холдынгу «Салея» пабываў кіраўнік Камітэта дзяржаўнага кантролю Леанід Анфімаў. Ён сустрэўся з працоўным калектывам.
«Імклівае развіццё ТАА «Салея» разбівае перакананні зласліўцаў і песімістаў пра тое, што эканоміка знаходзіцца ў крызісе», — заявіў тады кіраўнік КДК.
23‑гадовы рэпер з Астраўца загінуў за Расію на вайне. Паваяваў ён, відаць, каля месяца17
Каментары