Беларускія навукоўцы даказалі шкоду мабільных тэлефонаў для самцоў
Выпраменьванне мабільнага тэлефона парушае рэпрадуктыўную функцыю ў жывёл. Беларус Генадзь Верашчака выпусціў пра гэта манаграфію, а кароткі пераказ дае газета «Навука».
На працягу некалькіх гадоў беларускія навукоўцы вывучалі ўплыў мабільнага тэлефона на здароўе самцоў жывёл. Цікавілі іх у першую чаргу жывёлы «ў раннім постнатальным перыядзе» — дзеці. Над праблемай працавалі спецыялісты з лабараторыі эндакрыналогіі і біяхіміі Інстытута радыебіялогіі НАН Беларусі ў супрацоўніцтве з БДУІР.
Даследнікі выявілі, што апраменьванне жывёл на частотах 900 Мгц і 1800 Мгц на працягу 8 гадзін штодня на працягу аднаго і двух месяцаў уплывае на рэпрадуктыўную сістэму самцоў. У групе апрамененых жывёл патомства аказалася меншым, а палавы баланс зрушыўся ў бок самцоў. Навукоўцы адзначылі ў іх паскарэнне палавога развіцця, дыспрапорцыю працэсу сперматагенезу і падзенне жыццяздольнасці палавых клетак.
«Пры пэўных умовах гэта можа ўяўляць небяспеку для здароўя чалавека, — піша навуковец. — Якія гэтыя ўмовы? Перш за ўсё, гэта працягласць размовы і інтэнсіўнасць сігналу. Калі нехта выкарыстоўвае мабільны тэлефон больш за гадзіну ў дзень, ён трапляе ў групу рызыкі. Неабходна таксама ўлічваць асабліва высокую адчувальнасць да ўздзеяння электрамагнітных палёў растучага арганізма, і таму варта абмяжоўваць або забараняць выкарыстанне мабільнікаў дзецям і падлеткам».
Раней навукоўцы з іншых краін ужо прыходзілі да падобных высноў. Напрыклад, у лютым 2016 года ізраільскія навукоўцы распавялі пра сувязь паміж звычкай насіць смартфон у кішэні штаноў і канцэнтрацыяй смерматазоідаў у семявай вадкасці чалавека.
Цяпер чытаюць
«Узнікаюць уяўленні, што палітвязні мусяць быць стойкімі, сабранымі, удзячнымі. А рэальнасць розная». Пагаварылі з людзьмі, якія водзяць дэпартаваных літаральна за руку
Каментары