Мінабароны РФ для процідзеяння нарошчванню сіл НАТА каля межаў Расіі створыць дзве новыя дывізіі ў Заходняй ваеннай акрузе і адну — у Паўднёвай.
Пра гэта паведаміў кіраўнік ваеннага ведамства Сяргей Шайгу, перадае ТАСС.
«Міністэрствам абароны прымаецца шэраг мер з мэтай процідзеяння нарошчванню сіл НАТА ў непасрэднай блізкасці ад расійскіх межаў. Да канца года дзве новыя дывізіі будуць сфармаваныя ў Заходняй ваеннай акрузе, адна — у Паўднёвай ваеннай акрузе», — сказаў Шайгу на селектарнай нарадзе ў ведамстве.
Цяпер ужо вядзецца добраўпарадкаванне месцаў дыслакацыі новых злучэнняў, адзначыў міністр.
«Мною былі дадзеныя даручэнні ўжываць пры ўзвядзенні аб'ектаў самыя перадавыя будаўнічыя рашэнні. Гаворка ідзе пра блокава-модульныя канструкцыі. Тэхналогія паточнай вытворчасці і пастаўкі модуляў дазваляе ўзводзіць будынак на працягу трох — максімум чатырох тыдняў», — удакладніў міністр.
Па словах Шайгу, пры неабходнасці збудаванне можна аператыўна разабраць і перавезці на іншае месца. Такім жа аператыўным спосабам наладжваецца ўся сістэма забеспячэння, уключаючы кацельні.
Стварэнне трох новых дывізій на заходнім кірунку Шайгу анансаваў яшчэ ў студзені. Пазней стала вядома, што новае мотастралковае злучэнне з'явіцца пад Растовам-на-Доне, яшчэ два — у Смаленскай і Варонежскай абласцях.
Кожная з новых дывізій, як паведамлялася раней, будзе мець у сваім складзе прыкладна па 10 тысяч чалавек.
Раней міністр абароны ЗША Эш Картэр пацвердзіў, што НАТА абмяркоўвае магчымасць размясціць чатыры батальёны ва ўсходніх краінах альянсу.
Каментары