У сеціве знайшлі архіў, у якім сабрана амаль 3,5 тысячы гульняў і праграм для аперацыйнай сістэмы MS-DOS.
Як піша «Лента.ру», першыя файлы былі загружаныя ў снежні 2014 года, аднак архіў пастаянна абнаўляецца. У прыватнасці, у красавіку 2016 года зборнік дапоўніўся гульнёй 1991 года X-Fire.
У калекцыю ўвайшлі экшэны, стратэгіі, прыгоды і гульні іншых жанраў, а таксама розныя забаўляльныя праграмы. У прыватнасці, у архіў даданыя Prince of Persia, Pac-Man, Wolfenstein 3D, SimCity.
Больш за ўсё запамповак сабрала The Oregon Trail — адукацыйная гульня пра жыццё амерыканскіх піянераў, якая шырока выкарыстоўвалася ў школах Паўночнай Амерыкі. За паўтара года ёю зацікавіліся больш за 2 мільёны чалавек.
Для запуску рэтрагульняў на сучасным праграмным забеспячэнні неабходны спецыяльны эмулятар, які таксама выкладзены на сайце.
MS-DOS — аперацыйная сістэма, якая выпускалася з 1981 па 2000 год. З сярэдзіны 80-х да сярэдзіны 90-х гадоў MS-DOS была самай выкарыстоўванай аперацыйнай сістэмай на IBM-PC-сумяшчальных камп'ютарах.
Каментары