За галоўную ўзнагароду — Залатую пальмавую галіну, пазмагаюцца 22 кінастужкі. Упершыню ў гісторыі фэсту свае павільёны адчыняць Украіна і Расея.
61‑ы Канскі кінафэстываль пройдзе з 14 па 25 траўня.
Распачне сьвята кіно містычны трымценьнік бразыльца Фэрнанду Мэйрэлеша «Сьлепата» з Джуліянай Мур у галоўнай ролі. А закрые кінафорум новая стужка Бары Левінсана паводле мэмуараў Арта Лінсана «То што ж здарылася?» з удзелам Робэрта дэ Ніра і Бруса Ўіліса.
Крытыкі мяркуюць, што адным з галоўных прэтэндэнтаў на Залатую пальмавую галіну зьяўляецца рэжысэр Клінт Іствуд, аўтар фільма «Падмена», галоўную ролю ў якім згуляла Анджаліна Джолі.
Галоўнай падзеяй пазаконкурснай праграмы стане прэм’ера новага фільма Стывэна Сьпілбэрга «Індыяна Джонс і Каралеўства крышталёвага чэрапа» — чацьвертая частка сэрыяла пра прыгоды археоляга.
Старшынём сёлетняга журы будзе вядомы амэрыканскі актор і рэжысэр Шон Пэн. Галоўную ўзнагароду ўручыць актор Робэрт дэ Ніра.
Упершыню ў гісторыі фэсту свае павільёны адчыняць Украіна і Расея. Акрамя таго гэтыя краіны прадставяць свае фільмы — украінскія кінатворцы прадэманструюць шэсьць кароткамэтражных фільмаў, расейскія рэжысэры — тры паўнафарматныя мастацкія стужкі і адну дакумэнтальную.
У мінулым годзе Залатую пальмавую галіну Канскага кінафэстывалю атрымала стужка «4 месяцы, 3 тыдні і 2 дні» румынскага рэжысэра Крысьціяна Мунджу.
Кінафэстываль у Канах (Францыя) упершыню быў праведзены ў 1946 годзе з 20 верасьня па 5 кастрычніка. З таго часу ён ладзіцца штогод ў траўні. Адносіцца да найвышэйшай катэгорыі А. Дзякуючы таму, што паказы фэстывальных стужак закрытыя для простай публікі, карыстаецца шалёнай папулярнасьцю сярод кіназорак.
Цяпер чытаюць
Таццяна Заміроўская першы раз за 11 гадоў вярнулася з ЗША ў Еўропу. Многія манеры, звычкі і нават птушкі, якіх мы не прыкмячаем, выклікалі ў яе буру ўспамінаў88
Каментары